Nongpoh, Nohprah 15: Ki 11 tylli ki dukan bam ha Nongpoh, hynne ka sngi Thohdieng, ki la leit dawa biang ia ka Ophis u Deputy Commissioner ka Ri-Bhoi, ba un pyllait noh ia ka pisa baibam ba kot da ki phew lak jong ki nongtrei ha ka por jong ka elekshon MLA-2023.
Kine ki dukan kila pyntip ba kila pynbiang iaka bam ka dih jong ki Nongtrei ba khmih ia ki kam elekshon MLA-2023 naduh u bnai Kyllalyngkot 2023 haduh ba kut ka elekshon bad ka Ophis u Deputy Commissioner ka dang ai ka pisa ba mar T.50,000 kum ka advance kat haduh kine ki sngi.
Ki iathuh ba ka pisa bai bam jong kawei pa kawei ka dukan, kala kot da ki lak, phew lak bad don ruh kaba kot palat T.50 lak hynrei haduh mynta kim pat ioh wat shi naia ruh na kane ka bai bam jong ki nongtrei.
Haba kylli, kila pyntip ba kila wan iakynduh la bun sien ia u Deputy Commissioner bad man ka por ula aidaw ba ym pat don pisa, bym pat pyllait ka Sorkar bad ter ter.
Ki pyntip ba kila dep phah teng ruh ia ka shithi sha u Chief Electoral Officer (CEO) ka Jylla ban pyntip ia kane ka jingshah pisa baibam elekshon hynrei ki pyntip ba haduh mynta kim shym la ioh jubab satia.
Hynrei ki iathuh ba hynne ka sngi, u Deupty Commissioner ula pan por haduh ka 19 tarik mynta u bnai, ba un iakren biang ia ka Sorkar Jylla bad hadien kane, un sa ai jingtip ia kaei kaba ka Sorkar ka pynsngew.
Haba kylli, ki iathuh ba ia mynta hi kin ap ia ka 19 tarik Nohprah bad lada ka Sorkar kam pyllait noh ia ka pisa, ki lah ban pan noh da ka RTI bad kin sa shim ia kiwei pat ki sienjam.
