Shillong, June 25: U Myntri Rangbahduh ka Ri u Narendra Modi ula pynpaw ia ka jingsngewnguh ia ka jingioh pdiang ia ka jaiñ Ryndia kaba la ai sngewbha da u Myntri Rangbah ka Jylla u Conrad K. Sangma bad ula ong ba kane kadei ka shap jong ka jingriewspah ka Jylla ia ki jingdon jingem kiba rim bad ka jingsarong.
Ha ka shithi kaba la phah ha ka 24 tarik u Jylliew 2025, u Myntri Rangbahduh ula pynpaw ia ka jinglong kongsan ia kane ka jingai sngewbha bad bynrap ba ka don ka jingdawa kaba jur ha ka pyrthei baroh kawei ia ki mar kiba iai neh bad kiba la pynmih tynrai kum ka jaiñ Ryndia. Ula ong, “Ka rukom pyrkhat ka jong phi ka long kaba ktah bha bad ka long kaei kaei kaba dei ban ai jingiaroh”.
Haba pynpaw ia ka jingkongsan ia ki mar kiba iadei bad ka mariang bad kiba don ruh ia ka jingkitkhlieh ha ka imlang sahlang, u Modi ula ong, ba ka jaiñ Ryndia ka ieng kum kata ka bym ktah than ia ka mei mariang bad kadei ka rukom pynmih tynrai. Ula kdew ruh ba ka jingai dang shen ia ka shap Geographical Indication (GI) ia ka Jaiñ Ryndia, kadei ka lynti ban iaid shakhmat ha kaban kyntiew ia kane ka mar kaba la pynmih tynrai da ki paid riewlum ha ki rynsan jong ka pyrthei.
U Myntri Rangbahduh ka ri ula pynkynmaw ruh ia ka jingwan jngoh ka jongu ia ka jylla Meghalaya, ula iaroh ia ka rukom long ki briew, ka jingitynnad jong ka Jylla bad ia ka jingtbit jong ki samla.
“Haba nga wan jngoh iaka Meghalaya, nga dap da ka jingsngewkmen ia ka jingieid jong ki paidbah, ka jingitynnad jong ka mariang bad ka jingtbit jong ki samla kiba khlain” ula thoh ha ka shithi kaba la phah sha u Conrad K Sangma.
Haba iengskhem ha ka jingkular na ka bynta ka jingkiew jong ka Meghalaya u Modi ula ong, “Ryngkat lang, ngi ngin ia bteng ban shakri ia ki paidbah ka jylla bad ban pynthikna ba ka Meghalaya kan leh ia ka bynta kaba khraw ha kaban thaw ia ka Viksit Bharat.”
Na ka liang u Myntri Rangbah u Conrad K Sangma ula pynpaw ia ka jingsngewnguh ia u Myntri Ragbahduh ka ri u Narendra Modi halor ka jingithuh ia ka ‘Ryndia’ – ka jingioh shap ka Meghalaya na ka GI ia ka Eri silk, kaba la thain da ki longkmie jongka Ri Bhoi District.
Haba thoh ha ka X, u Sangma ula ong, “Nga sngewnguh ia u Myntri Rangbahduh ka ri u Narendra Modi halor ka jingithuh ia ka Ryndia — ka jingioh ka Meghalaya ia ka shap na ka GI ha ka Eri silk, ka jingthain kti jong ki longkmie jong ka Ri-Bhoi District. Nga ai khublei ia ki nongpynwandur KINIHO kiba la shna pynwandur ia ka jingdon jingem kaba rim da ka jingsumar bad ka jingtbit”.
U Conrad Sangma ula pyllait ruh ia ka shithi kaba la ioh pdiang na u Myntri Rangbahduh ka ri uba la pynpaw ia ka jingsngewnguh ia u Myntri Rangbah halor ka jingai sngewbha ia ka jaiñ Ryndia kaba long ka shap jong ka Meghalaya jong ka jingdon jingem kaba rim bad ka jingsngew sarong.
