Shillong, Jylliew 25 : U Myntri Khynnah ki kam korbar bar ri Prabitra Margherita ha ka sngi Balang ula iathuh ba palat 10,000 ngut ki ehrang jong ki kynhun kaikhlaw ka thain Shatei Lam Mihngi kila wan ban pyndem ialade bad mynta kila noh synniang lem ban tei ia ka Ri.
Haba kren sha ki nongthoh khubor, u Margherita ula pynpaw ia ka jingkiew kaba khraw ha kaban pynduna ia ki kam pyntriem ki kaikhlaw hapoh ka thain. “Ka jingiap namar ki kam kaikhlaw kala hiar da 85%, ki kam kaikhlaw kila hiar da 72%” ula ong.
U Myntri khynnah ula ainam ia kane ka jingjop sha ka jingiasoi ia ka soskular iasuk bad ki kynhun kaikhlaw bapher bapher haba pynpaw ba ki dang don sa 12 tylli ki soskular iasuk ki ban sa iasoi. “Ka thain Shate Lam Mihngi baroh kawei kala nang jam shakhmat ryngkat kiwei ki Jylla bad long shibynta jong ka Viksit Bharat” ula bynrap.
U Margherita ula pynbna ruh ia ki jingthmu ban pynjanai ia ki lad pyniasoh ha ka thain haba pynpaw ba baroh ki Nongbah jong ki Jylla kin sa pyniasoh noh da ka lynti rel bad ki liengsuin.
