Shillong, Naitung 19 : U MLA ka Voice of the People Party (VPP) na North Shillong Bah Adelbert Nongrum ha ka sngi Balang, ula iaroh ia ka rai jong ka Meghalaya Public Service Commission (MPSC) ban pynmih jingpynbna biang ia ki 35 tylli ki kam jong ka Meghalaya Civil Service (MCS) khnang ban lah pyntreikam ia ka Roster System ba nangne shakhmat.
U Bah Adelbert ha ka kyrwoh ula ong ba ia ka jingpynbna kaba rim la pynduh pyndam noh hadien ba ka don ka jingsam bhah ka bym ia ryngkat ha kaba haduh 14 tylli ki kam la ai sha ki paid Garo bad tang 11 tylli la ai sha ki Khasi Jaintia.
“Nga la kren ia kane ka kam bad buh jingkylli halor ka jingpyntreikam ia ka Roster System. Nga da kmen bha ban iohi ia ka jingpynbna ba thymmai bala pynmih da ka MPSC kaba la sam mar katjuh ia ka bhah kaba long mar 14 tylli ki kam sha ki paid Khasi Jaintia bad ki Garo” ula ong.
“Nga ngeit baka rai ban pynmih jingpynbna biang ia ka kam ka dei tang ka jingsdang ban pynbeit ryntih ia ka jingpyntrei kami a ka Roster System ha ki tnad bapher bapher jong ka Jylla” ula bynrap.
U Bah Adelbert ula pynpaw ruh “Nga khmih lynti ruh ba ka MPSC kan mynjur ha kaban pynmih jingpynbna thymmai ia ka kam LDA ha Secretariat, Veterinary Officer bad Junior Divisional Accountant ruh. Nga kyrmen ruh ba ka Central Recruitment Board jong ka Meghalaya Police ruh kan pynmih jingpynbna thymmai ia ki kam Constable khnang ban pynthikna ba ki samla kin nym duh ei ia ka hok jong ki”.
