Guwahati, Nailur 07 : Kawei ka skul Madrassa kaba don ha Pakhiura Char kaba hap ha Matia police station jong ka Goalpara district, Assam kala shah pynpra noh ha ki trai shnong kiba la kynnoh ba ia kane ka iing la pyndonkam da ki arngut ki nong Bangladesh na ka bynta ki kam lehnoh, ong ka khubor pulit hynnin ka sngi ba Ar.
Kane ka dei ka sien kaba nyngkong ha kaba ki trai shnong da ka mon sngewbha kila pynpra noh ia ka madrassa, kata halor ka jingkynnoh ba ia kane ka jaka la pyndonkam da ki arngut ki nong Bangladesh, u Aminul Islam bad u Jahangir Alom na ka bynta ki kam lehnoh.
Kine ki arngut la iathuh ba kila aijinghikai ha kiba bun ki bynta hapoh kane ka madrassa hapdeng ka snem 2020 bad 2022.
Katkum ki tyllong khubor heh sorkar la ong ba kine ki arngut ki nong Bangladesh, u Islam bad u Alom ki dei ki dkhot jong ka kynhun seng lehnoh Al Qaeda in Indian Subcontinent (AQIS) kaba don ka jingiadei bad ka kynhun Al Qaeda. Na ka liang ki bor pulit ki dang pynlong ka jingthwet ia kine ki arngut kiba la don hapdeng ka jingphet rieh.
Ki tyllong khubor pulit ki iathuh ruh ba ym shym la don ki heh sorkar kiba ia don bynta ha katei ka jingpynpra bad ba kawei ka iing hajan kane ka madrassa kaba don hapoh ka shnong Darogar Alga kaba hapoh Pakhiura Char ruh kala shah pynpra ha ki nongshong shnong.
“Ki nongshong shnong da ka mon sngewbha kila pynpra noh ia ka madrassa kumjuh ia ka iing kaba don mar pyrshah ban pynpaw ka jingsngew pyrshah kaba jur halor ki jingtreikam jong ki lehnoh jihadi,” ong ka khubor pulit.
U Jalaluddin Seikh, u nongialam niam uba la pynrung ia kitei ki arngut ki dkhot ka AQIS na ka bynta ban hikai ha katei ka madrassa ula shah kem noh ha une u bnai ba la dep halor ka jingkynnoh ialam bakla ia ki samla ha ka jylla.
Kane ka dei ruh ka madrassa kaba saw ha Assam ka ban shah pynpra noh naduh shi bnai mynta halor ka jingkynnoh don bynta ha ki kam lehnoh bad ka jingpyrshang ban thaw ia ki kynhun treikam jihadi ha ka jylla.
Ha u bnai Nailar ba la dep, laingut ki madrassa ha Morigaon, Barpeta bad Bongaigaon kila shah pynmadan noh ha ki bor sorkar.Ha ka 4 tarik mynta u bnai, hadien ka jingialang ba la pynlong hapoh ka headquarter jong ki pulit ha ka sorbah, na ka liang u Director-General of Police u Bhaskar Jyoti Mahanta ula pyntip ba katto katne ki MLA Muslim abd ki nongialam jong ki sawtylli ki kynhun seng Islamic ryngkat lang kila pyniaid haduh palat 1,000 tylli ki skul madrassa shimet, bad ula kular ban shim ia ki sienjam pyshah ia ki madrassa bad ki mosque kiba donkti ha ki kam lehnoh.
