Shillong Nailur 06: Ki nonghikai jong ka skul Pine Mount hynne ka 6 tarik u Nailur kila pynlong iaka jingiakhih da kaba rah lama ïong ban dawa ia ka Kong Aiom Ksiar Diengdoh ba kadei ban hiar shuki noh kum ka Principal jong ka skul.
“Ngi la wan ban ai da ka jingthoh sha ka sorkar jylla bad ka jingdawa kaba hakhmat eh ka jong ngi, kadei ban dawa ia ka Principal ba kan hiar shuki noh” ong ki nonghikai jong ka Pine Mount haba iakren bad ki nongthoh khubor.
Kat kum ka jingong jong ki, “Ka daw ba ngi pynlong ia ka jingiakhih, kadei namar ba iaki jingud jingnam ka jong ngi kaba ngi lah phah sha ka sorkar naduh ka 12 tarik haduh mynta kam shim la leh eiei. Kum ki nonghikai ngi don iaka jingkitkhlieh naka bynta ka skul bad ngi dang iai ap iaka sorkar hynrei kam shym la leh eiei”.
Ki nonghikai kila ong “Ngi don ka jingsngew noh mynsiem na ka bynta ka skul bad haduh mynta ngim tip ia kaei kaba ngi dei ban leh bad kane kadei ka sienjam kaba nyngkong kaba ngi shim ban ïeng kumne”.
“Watla katta ngim shym la pynduh klas ia ki khynnah. Ngi leit shim klas bad ngi ap haduh ba ki khynnah kin mih naka skul bad ngin sa pynpaw ia kane kaei kaei” kila bynrap.
Da ki phew ngut ki nonghikai ka Pine Mount kila mih bad rah ia ki lama ïong ban pyrshah jur iaka rukom long rukom man jong ka skul hapoh ka jingpyniaid jong ka Principal kaba mynta hynrei kim shym la treh pat ban batai bniah iaki daw kaba la pynlong syndon ia ki ban phah hiar shuki noh iaka Principal.
