Guwahati, Nailur 19: Uwei u briew ula duh ei la ka jingim katba san ngut kiwei pat kila ngat ha ki jingmynsaw jur hadien ka jingshah thombor ha ki hati khlaw ha Baksa district ka Assam, ong ka khubor heh sorkar hynnin ka sngi U Blei.
Kane ka jigjia kala jia hapoh ka shnong Khairani jong ka district ha ka miet sngi Saitjain ba la lah.Ia utei u lanot uba la khlad noh la tip kyrteng kum u Ravindra Boro. Katba ki san ngut kiwei pat kiba la ngat ha ki jingmynsaw ki dei kiba la tip kyrteng kum u Dhanpati Boro, Anil Daimary, Paresh Boro, Thengona Musahari, bad u Sulendra Boro.
Na ka liang ki nongshong shnong kila iathuh ba ka kynhun ki hati khlaw na ki jaka khalw ba marjan kila wan rung sha katei ka jaka ban wad bam.Ki trai shnong kila pyrshang ban pyntieng bad beh krad ia ki khnang ba kin leitphai pat sha khlaw, hynrei kine ki hati kila thombor pyrshah ia ki.
U Ravindra Bodo ula mynsaw jur bad la pynkynriah noh ia u shapoh ka hospital kaba marjan hapoh Rangia ha ryngkat kitei ki san ngut kiwei pat, hynrei na ka liang ki doktor kila pynbna ba u Bodo ula khlad noh.La ong ruh ba u Daimary ruh ula don hapdeng ka jingmynsaw kaba jur.
Kine ki trai shnong kila kam ruh ba kham shwa kila don katto katne ngut ki briew kiba la ngat ha ka jingshah thombor ha ka kynhun ki hati khlaw bad kynnoh ruh ia ka tnat Forest halor ka jingbym shim ia ki sienjam ban khanglad ia kiba kum kine ki jingjia.
Na ka liang ki nongshong shnong kila ujor ruh ba ki jaka rep jaka riang kila ngat khah khah ha ki jingshah pynjulor ha ki hati khlaw.Kumta kila kyntu jur ia ki bor sorkar ba kin shim mardor ia ki lad jingiada.
“Kane kam dei ka sien kaba nyngkong ba ki hati kin pyniap briew hapoh ha kane ka shnong, kham hashwa ruh kila don bun ngut ki briew kiba la duh ei la ka jingim na ka jingshah thombor ha ki hati,” ong uwei na ki nongshong shnong.
Hapoh Assam ka jingiatyngkhuh hapdeng ki hati khlaw bad ki nongshong shnong ka dei ka jingjia kaba la nangkiew katba nangmih ki sngi namar ka jingbym don shuh ia ki jaka shong jaka sah kiba biang.
Na ka liang ki stad khmih mariang kila dep lypa ban maham ba kum kine ki jingjia kin dang iai bteng lymda la ai jingiada ia ki khlaw ki btap.
Katkum ka jingioh lum jingkhein, kila don haduh kumba 229 ngut ki briew kiba la shah pyniap ha Assam tang ha kine ki lai snem ba la dep namar ka jingshah thombor ha ki hati.
