Nongpoh, Nailar 01: U wei u briew u la duh noh ia la ka jingim bad ar ngut kiwei pat ki la mynsaw jur, hadien ba ka auto rickshaw kaba ki shong ka la shah lymbub ha kawei pat ka kali Ford Endeavour, kane ka jingjia aksiden ka la jia hynne ka nohphai sngi ha ka por 2 baje shiteng eiei ha u surok bah NH-6 hajan ha ka shnong Pahammawlein, Ri Bhoi District.
La ioh jingtip, ba kane ka jingjia aksiden ka la jia ha ki por ba dang hap slap bha ha kine ki thain, ha kaba kawei ka auto rickshaw kaba don ia u number ML 10 B 3474 ka la iaid lyngba ka liang ka bym dei (Wrong Side) jong u surok bah NH-6 tad haduh ba kawei ka kali Ford Endeavour kaba don ia u number ML 10 C 5786 da ka jingbym lah tehlakam shuh u nongniah, kane ka kali ka leit ban tynrah markhmat ia katei ka auto rickshaw haduh ba kane ka auto ka julor hi phom bad 3 ngut ki briew kiba shong ha kane ka auto ki la mynsaw jur.
La ioh jingtip ruh, ba tang hadien katto katne por u nongniah jong kane ka auto rickshaw ba la tip kyrteng kum u Julius Nongsiej bashong basah ha Umling Lymbrang u la khlad noh namar ki jingmynsaw kiba jur, katba arngut kiwei pat ki la mynsaw jur ba kynthup ia u Silbanus Lapang, 28 na Nongkylla Byrnihat bad u Bijoy Makri, na Sohpu Umling.
Na ka liang ki bor pulit ka Nongpoh Police Traffic Branch ki la pynlong ia ka jingtohkit halor kane ka jingjia aksiden bad ki la rah ruh ia u Sartaj Ansari u ba dei u nongniah jong ka Ford Endeavour na ka bynta ban tohkit halor kane ka jingjia.
