Shillong, Nailar 1 : Ka sorkar jylla lyngba u Symbud Myntri Rangbah ka la khot ia kren biang la shai ka sngi Ba-ar ia ka HYC hadien ba ka jingiakren ha kane ka sngi Nyngkong halor u smart meter kam shym la pynhun ia ki.
Katkum ka jingiathuh da u General Secretary jong ka HYC Bah Roykupar Synrem la iathuh ba katkum ka Letter of Award (LOA) kaba iadei bad kitei ki smart meter ka long 232 klur. “Hynrei haba ngi khein pat katkum ka dor ba iathuh i Bah Prestone kam iahap satia,” u la ong.
Shuh shuh u ong ruh ba katkum ka DPR bad katkum ka LOA la kdew ba donkam haduh 1,72,000 tylli ki ki single phase smart meter bad kumba 2000 tylli ki three – phase smart meter. “Kumta lada khein ia ka dor katkum ka dor ba ai i Bah Prestone kata, 5889 multiply ia u 1,72,000 tylli ki single phase smart meter kumjuh ruh ia ki three – phase smart meter, ngi lap ba ka dor jong ka kontrak kam dei ban tam ia ka 111 klur tyngka,” u la ong.
Kumta, u ong ba ha kane ka sngi ki la wanrah syndon bad ki kot ki sla ban pyni markhmat ha i mynta ka sngi.
Utei u nongialam ka HYC u ong ruh ba dei hadien ba pyni ia kitei ki kot ki sla u la ong ba donkam ba kynduh ia kynduh ia u Director jong ka Distribution ha kaba la iakut ba lashai ka sngi kin kynduh ia u ban ioh jingshai shuh shuh haba iadei bad katei ka dor.
Na ka liang ka Seng ka ong ruh ba haduh mynta kim hun satia ia katei ka jingtip bad kumta kin iai bteng ban wad haduh ban da lap ia ka tynrai balei kata ka dor jong ki smart meter ka poi haduh 232 klur tyngka.
