Shillong, Jylliew 23: U Symbud Myntri Rangbah ba khmih iaka tnat Transport Bah Sniawbhalang Dhar u la pynbna ba palat 15 tylli ki bos thymmai yn sa pynkamai noh naduh ka 3 tarik Naitung, haba kyntu ïa ki tnat ba kin pynthikna ia ka jingsumar bha iaki bos bala don lypa.
U Bah Sniawbhalang u la ong ba ka Sorkar ka la ju bthah man ka por ia ki nongpyniaid bad iaki nongniah Bos ban maramot bad sumar bha ia ki kali khnang ba kin ym kylla long ki bym lah pyndonkam shuh tang hadien 1-2 snem.
“Na ka por sha ka por ngi la bthah ia ki nongpyniaid bad ki nongniah Bos ba kin maramot bad sumar bha ia ki Bos, kam dei ban long ba tang hadien tang 1-2 snem, kine ki Bos kim long shuh ban iaid, ngi iai kyrpad ia kiba peit ia kine ki Bos” la ong u Bah Sniawbhalang.
U Bah Sniawbhalang ula ong ba ula lum ia ka jingialang ha u bnai ba la dep ban bishar bniah ia ka jinglong jingman jong ki Bos khnang ba ki nongleit nongwan kin sngewtynnad ban pyndonkam iaki. “Ha u bnai ba la dep nga la khot ia ka jingialang ban pynthikna ba kine ki Bos kin long kiba bha bad kiba itynnad khnang ba ki briew kin ioh mynsiem ban pyndonkam ia ki,” u la pynpaw.
Ia kine ki bus thymmai yn pyllait paidbah na ISBT bad kin iaid ha ki lynti kiba bun ha kylleng ka nongbah Shillong.
“Ha ka 3 tarik Naitung ngan pyllait paidbah ïa ki Bos thymmai na ISBT ba kine kin iaid haki jaka thymmai jong ka nongbah. Ki don palat 15 tylli ki Bos thymmai,” u la ong.
U Symbud Myntri Rangbah u la kdew ba katto katne ki tnad, kynthup ïa ka Planning, Municipal, bad ka MUDA, ki pyndonkam mynta ïa ki Bos Sorkar, bad u la kyrpad ïa ki ban shim ïa ka jingkitkhlieh na ka bynta ban sumar bha bad maramot lada donkam.
“Ïa kine ki bos la pyndonkam da ki tnad bapher bapher kum ka Planning, Municipal, MUDA bad kiwei kiwei dei. Ngi kyrpad ïa ki ba kin sumar bha bad maramot ia kine ki bos nangne shakhmat,” u la bynrap.
