Aizawl, Nailur 23 : U Myntri Rangbah (CM) ka Mizoram u Zoramthanga hynnin ka sngi Palei ula pynlong ka jingiakynduh ia u Myntri kam pohiing (HM) ka sorkar pdeng u Amit Shah ha Delhi ban iakren ha kaba iadei bad ki kynrum kynram sain hima hapoh Myanmar bad ka jingwan tuid ki phetwir na kane ka ri ba marjan sha ki bynta khappud ka jylla Mizoram.
“Nga la iakynduh ia u Myntri kam pohiing ka sorkar pdeng hynnin ka sngi Palei bad iamir jingmut bad u ha kaba iadei bad ki kynrum kynram sain hima hapoh Myanmar bad halor ki jingeh namar ka jingwan tuid jong ki phetwir na kane ka ri ba marjan,” ong u CM lyngba ka Instagram.
Ula ong ruh ba na ka liang u Myntri ka sorkar pdeng ula bishar bniah ha kaba iadei bad ka jinglong jingman hapoh Myanmar bad halor ka jingwan tuid jong ki phetwir nong Myanmar sha ki bynta khappud ka India.
Ki tyllong khubor heh sorkar kila ong ba haduh kumba 30,000 ngut ki phetwir nong Myanmar kila shong riehtngen mynta ha ki bynta bapher bapher ka Mizorm, kata naduh ba ki shipai junta ka Myanmar kila kurup noh ia ka bor synshar ha kane ka ri ba marjan naduh u bnai Rymphang jong ka snem ba la dep.
Kine ki phetwir kiba bun na ki, kiba dei na ka jylla Chin kila don mynta hapoh ki ktem sah shipor, katba kiwei pat kila shu shong ha ki iing ba shu wai bad don ruh kiba shong ba sah bad la ki jong kiba haiing hasem ha Mizoram.
Ia kine ki phetwir la hap ruh ban pynbiang ia ki lad jingiarap mar bam nalor kiwei pat ki jingdonkam ba kongsan da ka sorkar, ki kynhun seng treimon sngewbha, ki kynhun balang bad da ki bor shnong.
U Zoramthanga ula ong ruh ba u Amit Shah un pynlong ka jingwan jngoh sha Mizoram ha u bnai Naiwieng u ban wan na ka bynta ban plie ia ka ktem jong ki shipai Assam Rifles ha Zokhawsang, kumba 15 km na Aizawl.
“Nga la kyntu ia u Myntri ka sorkar pdeng ba un wan jurip sha Mizoram na ka bynta ban plie ia ka headqaurter jong ki shipai Assam Rifles ha Zokhawsang. Watla ula mynjur ia kane ka jingkyrpad, hynrei un dang pynbeit ha kaba iadei bad ki tarik,” ong shuh shuh u CM ka Mizoram.
Ka sorkar jong ka Mizo National Front (MNF) hapoh ka jingialam jong u Zoramthanga kala dawa na ka bynta ka jingpynkynriah ia ka ktem jong ki shipai Assam Rifles kaba don hapdeng jong ka nongbah sha Zokhawsang.
U Zoramthanga uba la don mynta ha ka nongbah jong ka ri un leitphai sha la ka jong ka jylla lashai ka sngi Saitjain, ong ka tyllong khubor heh sorkar.
