Jowai, Naitung 25: Ka Ophis jong u Divisional Soil & Water Conservation Officer ka Jowai Territorial Division, Jowai, kala pynlong ia ka jingialap paidbah bad ka Rally kum shibynta jong ka Jal Shakti Abhiyan ban pynsngewthuh ia ki paidbah halor ka jing kongsan ban pyllait ia ka umslap.
Kane ka rally ka dei kaba la pynlong halor ka mat “Catch the Rain, Where it Falls bad When it Falls” kaba la iashimbynta da ki Khynnah skul ka sor Jowai bad la pynsdang ia ka na madan Daimasi, Ladthalaboh. Ia kane ka rally la khaweh da u Additional Deputy Commissioner ka Jowai, u PK Boro.
U Boro haba ai jingkren ula ong ba kane ka Rally ka long kaba kongsan bha bad ba donkam ban pynsaphriang ia ka khubor sha ki paidbah ia ka jingdonkam ban pyllang noh ia ka umslap.
“Kane ka dei ka jingeh ha kine ki sngi ki ia ba mynta bad ngi tip ba ka pyrthei baroh kawei ka mad ia kane ka jingeh lyngba ka mei mariang. Ki kam u briew kila pynkylla bad pynjulor ia ka mariang. Ngi dei ban sngewthuh kumno ban iada ia ka mariang” ula ong haba kyntu ia ki khynnah skul ban rah ia ka khubor sha la ki jong ki Iing ki sem ban iada bad sumar ia ki tyllong uum.
U Soil & Water Conservation Officer ka Jowai Territorial Division Bah T War ula ong “Ngi iwei pa iwei ngi lah ban synniang ha kaban tyngkai ia ka um da kaba leh ia kaei kaba ngi dei ban leh man ka sngi kam pher ka dei kaba rit eh.
“Ngi donkam tang ka jingkut jingmut halade. Ha ka jaka ba ngin thied ia ka um plastic, ngi dei ban rah noh ia ka um nala iing, ban pynmlien ha kaba pyndonkam noh da ki sla haba song jingbam ha ka jaka jong ki foil ne plastic bad ban rah ruh da kip la na iing haba leit siew leit tda ia ki marbam” ula ong.
Haba pyni nuksa, une u Ophisar ula pyntip ba ka phyllaw jong ka Ophis jong u ka dei ka bym shah shuh ban pyndonkam ia ki plastic. “Ngi la leh ia kane mynta la shisnem bad ngi la thung ruh ia ki sla lamet hapoh ka phyllaw Ophis. U la wer ia baroh ban kut jingmut ha kaban tyngkai ia ka um”.
Ki Khynnah skul kila sdang ia ka rally na madan Daimasi, Ladthalaboh haduh ka Ophis ka Soil & Water Conservation kaba don ha Moowamon, Mihmyntdu bad kila rah ruh ia ki placard ba don ia ki jiingthoh ba iadei bad ka jingtyngkai ia ka um bad ban pynneh pynsah ia ki tyllong um.
Nalor kane ka rally bad ka jingialap paidbah, la pynlong ruh ia ka jingiakop thoh essay halor ka mat “Catch the Rain, Where it Falls and When it Falls”.
