Itanagar, Jylliew 23: Ki Pulit jong ka Arunachal Pradesh ki la kem ïa uwei u nongkhaii uba sah ha Assam uba la shah kynnoh ba u la pynlong ïa ka kam thok ha ka jingbei tyngka kaba ₹34.33 klur da kaba kynnoh ba u la pyndonkam ïa ki kot ki sla ba thok jong ka sorkar bad ki kam thok ba u don ka jingïadei kaba jan bad Myntri Rangbah ka Jylla.
Une u nongshah kynnoh ba la tip kyrteng kum u Rishiraj Borkotoky (41) na Guwahati, Assam, u la shah kem ha ka 20 tarik Jylliew hadien ka jingtohkit kaba la sdang halor ka jingujor ba la ujor da u wei u nongkhaii u Rajesh Agarwal.
Ki pulit ki la iathuh ba u Borkotoky u la kynnoh ba u la pynngop ia u nongujor ban bei tyngka ha ka projek Extra Neutral Alcohol (ENA) ha Assam, da kaba pyni dur ialade kum u nongseng kam seng jam uba riewspah bad uba don ka jingiadei bad ki heh sorkar bad ki nongialam sain pyrthei.
Haba kren sha ki lad pathai khubor mynta ka sngi, u heh pulit ka Naharlagun u Dr Nyelam Nega u la ong ba ia kane ka kam la register ha Banderdewa Police Station ha ka 5 tarik Jylliew katkum ki kyndon bapher bapher jong ka Bharatiya Nyaya Sanhita (BNS), 2023.
Katkum ka jingtohkit, la kynnoh ba une u nongshah kynnoh u la pyni ia ki kot ki sla thok kiba la kynnoh ba la pynmih da ka Revenue Department hapoh jong ka Union Finance Ministry bad ka Office jong u Cabinet Secretary ban ioh ia ka jingshaniah jong u nongbei tyngka.
Shuh shuh ki pulit ki la pynpaw ba la kynnoh ba u Borkotoky u la pyndonkam da ka WhatsApp Account thok kaba pyni ia ka dur profile jong u Myntri Rangbah ka Assam bad u la sam ia ki dur kiba pyni ia ka jingiajan jong u bad ki riew pawkhmat ha ka sain pyrthei.
“Ngi dang pynshisha ia ka sur kaba la kynnoh ba ka don ka jingiadei bad katei ka account,” la ong u heh pulit.
Da kaba ngeit ba ki jingkynnoh ki long kiba shisha, la ïathuh ba u nongujor u la transfer palat ₹34.33 klur sha u nongshah kynnoh ba la sdang naduh u snem 2022.
Da kaba iaid katkum ki kor syntiat bad ki jingioh khubor, ki pulit ki la buddien ia u Borkotoky ha Guwahati bad kem ia u. Ha kane ka jingkhynra, ki ophisar ki la kurup san tylli ki mobile phone bad kawei ka kali heh kaba shongdor kumba ₹1.5 klur.
Hadien la rah ia une u nongshah kynnoh hakhmat ka Ïingkashari Judicial Magistrate First Class (JMFC) ha Yupia, ha kaba la pynngat 10 sngi ha police custody na ka bynta ban tohkit bniah ia u.
Ki pulit ki la iathuh ba ka jingtohkit kaba kham bniah ka dang iaid shakhmat ban pynthikna la ki don ne em ki briew kiba donkti ha katei ka jingbei tyngka kaba la kynnoh bad lada la thok ia kiwei pat ki lanot da kaba pyndonkam ia ki rukom kiba kum kita .
