Shillong Rymphang 10: Ka seng Hynniewtrep Youth Council (HYC) hynne ka sngi kala sam ia ki kot lyngkdop ban pynsngewthuh ia ki paidbah ban jied ia ki nongmihkhmat da ka jing kitkhlieh bad ka HYC ka sngewkhia jur iaka jingpyndonkam iaka bor jong ka pisa bad ki jingdih pynbuaid.
“Ngi dap da ka jingsngewkhia halor ka jingioh kurup ka tnad Election iaka pisa bad ki jingdih pyn buaid kynthup ia u drug kiba la shongdor haduh T.52 klur. Ka HYC ka pynrem jur lada don kino kino ki kyrtong ne ki seng sain pyrthei kiba pyndonkam ia u drok bad ka kyiad ban pynshongshit ia ki paidbah” ong u Roykupar Synrem.
Une u nongialam ula ong, “Ngi tip ba ka don ka jingioh rung jong u drug ha kane ka jylla hynrei ka jingkiew kynsan ka jingwan u drug ha kum kane ka por elekshon, ka pyni ba ka don eiei sha lyndet kaban wanrah ia ka jingma iaka jaidbynriew hi baroh kawei”.
Ula ong, ka seng ka angnud ba lada ka jylla ka ioh ia ki nongthawaiñ, kin thaw ia ka polisi treikam ban tehlakam ba u drug ba yn ym ioh rung ha ki longiing namar u drug ula pynjot ia kiba bun ki longing bad iaka jylla hi baroh kawei.
U Bah Roykupar ula ong, ha ka 27 tarik u Rymphang ki paidbah ki ioh ia ka lad kaba shisien haka 5 snem ban jied ia ki nongmihkhmat kumta ula kyntu iaki paidbah ba kidei ban mih ha katei ka sngi bad kidei ban jied da ka jingkitkhlieh na ka bynta ka jingbha jong ka lawei jong ka jylla bad ban ioh ia ki MLA kiban thaw ia ki aiñ ki kanun bapher bapher ban iada iaka jaidbynriew bad ia ka jylla.
Ula kyntu iaki paidbah ba kim dei ban ngop ne shah pynbiej haka pisa ne ki jingdih pynbuaid ki ba long tang shipor hynrei kiban pynbabe pat iaki ha ki 5 snem kiban wan.
Ka seng HYC kala sdang iaka jingsam iaki kot lyngkdop, Rai Eh Daw Campaign 2023 na Motphran bad nangne kila bteng ban leit sam ia kine ki kot ha kylleng ki jaka ban pynsngewthuh ia ki paidbah ba kin jied da ka jingkitkhlieh ia ki nongmihkhmat sha ka iingdorbar thawain ka jylla.
Ia kine ki kot lyngkdop la sam ruh ha kylleng ki jaka jong ka East Khasi Hills District bad ha ki District jong ka rilum Khasi Jaintia.
