Shillong, K’Lyngkot 27: Ha ka jingpyrshang ban pynkhlain ia ki buit treikam ban ialeh pyrshah ia ka jingdih pynbuaid bad ban pynkhlain ia ki lad ai jingiarap, u Director Mishon jong ka Drug Reduction Elimination & Action Mission (DREAM) ka tnat Social Welfare, ula ialam ia ka kynhun ba 11 ngut sha Kerala ban ioh ia ki jingtip khambha halor ka jingiakhun pyrshah ia u drok.
Kane ka kynhun ka kynthup ïa ki riew shemphang, kum ki stad haka rehabilitation, ki ophisar naka tnat ka koit ka khiah, Jt Director ka Health Services (MI), Psychiatrist bad Senior Medical & Health ophisar ba la shah hikai ban sumar ia ki nongdih droks.
Ka jingleit ka thmu ban ïoh ïa ki jingshemphang kiba kordor shaphang ki rukom sumar ba kham tbit jong ka Kerala, ki jingpynsngewthuh paidbah bad ki buit treikam jong ki pulit.
Ha kane ka jingleit jngoh kaba lai sngi, ka kynhun kan ïashim bynta ha ki jingïakren bad ki kynhun bapher bapher bad ki riew shemphang na ki Rehabilitation Centre. Ka kynhun kan leit jngoh ruh ïa ki hospital ba pawnam, ki Rehab Centre, bad kiwei kiwei.
U Director ka Mission u la ban jur ba kane ka jingleit ka pyni ia ka jingshimkhia jong ka DREAM ban ioh jinghikai bad ban shim ia ki rukom treikam kiba bha tam na kylleng ka Ri ban weng ia ki jingeh jong ka jingdih buaid.
Ki jingshem na kane ka jingleit kan iarap bha ban thaw dur ïa ki polisi ka Meghalaya ha ka jingïakhun pyrshah ïa ka jingpyndonkam bakla ïa u drok.
