Shillong Naitung 04: Ka North-Eastern Hill University (NEHU), Shillong, kala pynkhreh ban jam shaphrang ha ki kam ba don jingiadei bad ka Kolshor, ka jingai jinghikai ha ki ktien bapher bad ka jingpynioh kam iohjam ha kylleng jong ka pyrthei na ka bynta ki samla pule jong ka thain shatei lamihngi jong ka ri.
Ha ka jingleit jngoh sha ka Embassy jongka Russian Federation ha New Delhi, u Vice Chancellor ka NEHU u Prof Prabha Shankar Shukla, ula shimbynta ha ki jingiakren ki bapher bapher bad ka Dr. Elena Remizova, Head of Representation, Counsellor jongka Embassy bad Director jongka Russian House, New Delhi.
Kane ka jingiakren kala pynleit jingmut ha kaban pynkhlain ia ka pule puthi lyngba ka jingiatreilang, ban kyntiew ia ka ktien Russia bad ban plie lad ban don ia ka jingsam mar kylliang ia ka kolshor.
Baroh arliang kila kubur ia ka jingdawa ba ki samla pule ka ri India ki thrang ban ioh pyntbit ha ka ktien bar ri kaba kynthup ia ka ktien Russia kum ka lynti ban jam shaphrang ha ka jingpule, ka jingwad bniah bad ki kabu kiban ioh kam shabar ri.
Haba pynpaw halor ka jingmih lyngba katei ka jingleit jngoh, u Prof. Shukla ula ong, “Nga dap da ka jingsngewtynnad bad ban ioh mynsiem lyngba ka jingpynthikna bad ka jingai jingkyrshan ka Russian Federation. Ka NEHU ka iengskhem pura ha kaban pynkupbor ia ki samla pule da ka jingtbit bad ka jingshemphang ha kane ka pyrthei kaba mynta. Ban seng ia ka Russian House bad ia ka Language Centre kaba kyrpang ym tang ba kan kyntiew ia ka jingtbit ha ka ktien ka thylliej hynrei kan pynngam jylliew ruh ha kaban sngewthuh ia ka kolshor bad ban plie ia ki kabu bapher bapher”.
Ka Russian House ha NEHU kan ai ia ka jingshakri kaba pura ia ka jinghikai ia ka ktien, ki kam kiba iadei bad ka kolshor bad ka jingiatreilang ha ki prokram kiba iadei bad ka pule puthi. Kan pynlong ruh ia ka jingai jinghikai kiba kyrpang, ki Certification Course ha ka Russian, ka jingbishar ia ki phlim, ka thoh ka tar bad ka jingiasam jingtip hapdeng ki nonghiakai bad ki samla pule.
Ka Language Centre kan iarap ruh ha kaban kyrshan ia ki samla pule ban pynkhreh ia ki eksam kiba long ha kylleng ki ri bad ki jingtyrwa ban kyrshan ia ka jingwad bniah da ka jingiatreilang bad ki jaka pule kiba na Russia.
Da kaba iaid ryngkat bad katei ka sienjam, ka NEHU kala pynkhreh ban iasoi ia ka Memorandum of Understanding (MoU) bad ka Dr. Skill kaba dei ka kynhun kaba shempahng ha kylleng ka ri ban pynioh kam, kaba la lah ruh ban seisoh ha kaban pynioh kam ia ki 150 ngut ki samla pule ha ki lain bapher bapher.
U Prof. Shukla ula pynpaw ruh ia ka jingsngewnguh ia ka jingtrei shitom jongka Dr. Skill bad ula ong “Nga dap da ka jingsngewkmen ban iatreilang bad ka Dr. Skill, kaba la don ia ka rekod kaba biang tam ha ka pyrthei ha kaban pynioh kam pynioh jam kaba long ruh ka jingthmu kaba iaid ryngkat lang bad ka jingangnud jong ka NEHU ban pynkup bor ia ki samla pule”.
Ka Dr. Elena Remizova, kala ong “Ka Russian House ka dap da ka jingkmen ban iatreilang bad ka NEHU ha kane ka sienjam kaba kongsan ban pyniar ia ka ktien bad ia ka pule puthi bad ia ka kolshor jong ka Russia hapoh ka thain shatei lam mihngi jong ka ri India. Ngi iengskhem ha kaban pynbiang bad ban ai ia ka jingkyrshan kaba pura kynthup ban ailad ban khmih ia ki jingdon jingem ha ki Library, ki kot ki sla bad ia ki nonghikai kiba la tbit bha. Ha u Naiwieng, ngin sa phah ia ka kynhun ki riewstad na Russia ban ai jingkyrshan ban seng bad ban pynkhlain ia ka Language Centre. Ngi ngeit skhem ba kane ka jingiatreilang kan thaw ia ki lynti kiba don jingmut na ka bynta ki samla pule ka ri India ha ka jingbeh ia ka jingnang jingstad bad ki lad ban iohkam ha Russia.”
, Shillong, kala pynkhreh ban jam shaphrang ha ki kam ba don jingiadei bad ka Kolshor, ka jingai jinghikai ha ki ktien bapher bad ka jingpynioh kam iohjam ha kylleng jong ka pyrthei na ka bynta ki samla pule jong ka thain shatei lamihngi jong ka ri.){kind=link}