Iakynduh u CM ia u Dharmendra, kyrpad ban wanrah ia ka CTE ha Meghalaya

Shillong, Naitung 04 : U Myntri Rangbah ka Jylla Conrad K Sangma hynne ka sngi Ba-ar, ula iakynduh ia u Myntri ka Ministry of Education Dharmendra Pradhan ha New Delhi bad kyrpad ban wanrah ia ka College of Teachers Education (CTE) ha Jylla Meghalaya.

U Conrad ula pyntip ba ka jingiakren bad u Myntri ka Sorkar Pdeng ka long kaba seisoh bha hynne ka step. Ula ong ba ka don shibun ki nonghikai ki bym pat dep hikai pyntbit ha Jylla namar ka jingduna ki jaka ai jinghikai.

U Conrad ula pyntip ba ha kane ka jingiakynduh la iakren sani bha halor ka jingseng ia ka College of Teachers Education (CTE) hapoh ka Jylla.

“Nalor kane, nga la kyrpad ruh ban mynjur lang ia ka jingkyrpad naka Sorkar Jylla ban pyndep noh ia ka jinghikai pyntbit ia baroh ki nonghikai jong ki skul Secondary bad Higher Secondary da kaba pynlong ia kawei ka prokram hapoh ka IGNOU programme bad ia ki nonghikai skul Elementary hapoh ka NIOS Programme” ula bynrap.

U Conrad ula pyntip ruh “Ka Sorkar Jylla kala pynkhreh ban pyntreikam ia ka National Education Policy (NEP) kumba ka long bad haba khmih ia ki jingdonkam, ka Sorkar kala pan ia ka jingkyrshan na ka Sorkar Pdeng ban lah pynbiang ia ki jingdonkam ki tiar ki tar ha ki skul hapoh ka Jylla”.

“Nalor kane, la kyrpad ruh ia ka Sorkar Pdeng ban kyrshan ia ka Jylla ha ka liang ka jingai song pisa hapoh ka SSA khnang b aka Jylla kan lah ban iaid kat kum ki thong bad jingthmu jong ka NEP 2020” ula ong.

U Conrad ula pyntip ruh ba ka Jylla kala kyrpad ia ka Sorkar Pdeng ban thung noh ia u Pro Vice Chancellor, Registrar, Finance Officer bad University Enigineer kiba la sah thylli ha North Eastern Hill University (NEHU). “Ngi la kyrpad ban thung briew noh ha palat 200 tylli ki kam nonghikai bad ki nongtrei kiba lait thylli hapoh ka University” ula bynrap.

Ula kyrpad ruh ia ka Sorkar Pdeng ban pynjynsur ia ki kyndon jong ka PM-USHA scheme, ka ban ai jingmyntoi ia ki University ka Jylla, kaba dang don ha ka jingsdang jong ka jingpyntreikam.

U Conrad ula sam paidbah ruh ia ki dur halor ki jingiakynduh bad u Myntri ka Sorkar Pdeng lyngba ki rynsan social media jong u.

Also urged him to consider the request from the State Government to clear the backlog as a one time amnesty programme for the secondary, higher secondary in-service teachers of Meghalaya under the IGNOU programmes and for the elementary in-service teachers under the NIOS…

— Conrad K Sangma (@SangmaConrad) July 4, 2023

Pule lang ia kane: Dawa ki Nonghikai SSA na Ri-Lum Garo ban pyllait ia ka tulop ba sahteng 3 bnai