Guwahati, Naitung 04 : Ki Pulit ka Assam kila ioh kurup haduh 40 tylli ki masi ba mut khaii be-ain, napoh kawei ka trok kit umphniang hajan Sonapur, Guwahati ha ka sngi nyngkong.
Ki Pulit kila kem ia arngut ki briew kiba donkti ha kane ka jingioh kurup ia kine ki masi.
Kat kum ka khubor, kine ki masi ki dei kiba wan rah na Dhemaji, Assam da ka jingthmu ban pynpoi sha Meghalaya. Ia kine ki masi la buhrieh ha ka tanky jong kane ka trok.
“Ngi la ioh ia ki khubor syntiat bad ka kynhun ki Pulit kila leit mar mar sha katei ka jaka bad kurup ia kane ka trok kaba thep ia ki masi bad ngi la kem ruh ia arngut ki briew” ong ki Heh Pulit.
Ula ong ba ha ka sien ba nyngkong eh, ki nongkhaii masi kila pyndonkam ia kane ka buit ban khaii tuh ia ki masi. Ki nong khaii kila pyndonkam ia ki buit bapher bapher ban lah pynpoi ia ki masi sha ki jaka ba ki thmu ban pyniaid iew.
Ka jingtohkit halor kane ka jingjia kala iaid shakhmat.
Pule lang ia kane: Dawa ka KSU ia ka NEIAH ban wengkam noh ia ka briew ba shu wan ialam na UP
