Shillong, Naitung 04 : U Myntri Rangbah ka Jylla, Conrad K Sangma, ula iakynduh ia u Myntri ka Ministry of Education Dharmendra Pradhan hynne ka sngi Ba-ar ha Nongbah Delhi bad kyrpad ia ka Ministry bad ka National Testing Agency (NTA) ba kin buh lang ia ki Common University Entrance Test (CUET) centre ha baroh 12 tylli ki District ka Jylla.
Ia u Myntri Rangbah ka Jylla la synran da u Myntri ka Tnad Pule Puthi Rakkam A Sangma lem bad u Adviser ka Tnad Pule Puthi ka Jylla Bah Himalaya M Shangpliang.
Haba sam ia ka khubor lyngba ki rynsan social media, u Myntri Rangbah ula thoh “La kyrpad ia u Myntri ka Tnad Education ka Sorkar Pdeng Dharmendra Pradhan ban un ai ka jingbthah ia ka Ministry of Educaton bad ka NTA ba kin pynlong ia ka eksamCUET ba kyrpang ia kito ki samla pule ka Meghalaya kiba la duh ban ialeh ia ki eksam namar ka jingngat ialeh eksam shabar ka Jylla”.
Ula ong ruh ba ka Sorkar Jylla kala kyrpad ia ka Sorkar India ba kan mynjur lang ha kaban buh ia ki CUET Centre ha baroh ki 12 tylli ki District ka Jylla, ki ban don ha ki jaka pule kiba biang lut ki tiar ki tar ha kaban pynlong ia ka eksam CUET.
“Khnang ba ka Sorkar kan shimkhia mar mar, ngi la ai jingbit ba kan buh ia ka CUET Centre ha Shillong, Tura, Jowai, Nongstoin bad Williamnagar, ki ban kdup lang ia kiwei ki District ba marjan” ula ong.
Lah ban kdew hangne, ka National Testing Agency (NTA) kala rai ban pynjlan ia ka eksam CUET na ka bynta ki samla pule jong ki Jylla ka thain Shatei Lam Mihngi kiba la ngat ban leit ialeh ia ka eksam ha kylleng ki Jylla jong ka Ri.
Bun bah ki samla pule na Meghalaya ki dei kiba la ngat ban ialeh ia ka eksam CUET ha Jharkhand, West Bengal, Assam bad kiwei kiwei ki Jylla jong ka Ri.
Pule lang ia kane: Iakynduh u CM ia u Dharmendra, kyrpad ban wanrah ia ka CTE ha Meghalaya
