Shillong, Jylliew 21: U MLA ka South Shillong Constituency Bah Sanbor Shullai hynne ka sngi Thohdieng ula phah tuklar ha u Lat ka Jylla Phagu Chauhan ban kyntiew kyrdan bad shna pynbha noh ia ka Lady Kerr Welfare Centre (Red Cross Hospital) Laban, haba phaikhmat khamtam eh sha ka jingpynkha khun bad ai jingsumar ia ki Khunlung.
Une u MLA bad Nongialam ka BJP ula leit iakynduh ia u Lat ka Jylla ka Jylla ha ka Iingsah u Lat ha Rajbhavan, Shillong.
U Bah Sanbor Shullai ula pynpaw ha u Lat ka jylla ba iakatei ka projek lah ban mynjur da ka sorkar pdeng lyngba ka PM-DevINE Scheme kum kaba kongsan tam namar baka Red Cross Hospital kadei kaba la rim tam kaba ai jingshakri ia ki longing kiba duk ba suk.
Ula pynpaw ba katei ka Hospital kadei kaba la seng naduh u snem 1920 ha Laban ia kaba la pyndonkam da ka IRCS bad kane ka Hospital mynta ka don la palat 100 snem bad kala rim bad kala jot bha ia kaba tang da kaba shu maramot ruh kan ym long.
Kumta ban pynlong ia kane ka jaka ai jingsumar kaba don da ki tiar ki tar kat kum kane ka juk kaba mynta, ka long kaba kongsan bha ban kyntiew ban shna thymmai bad ban buh ia ki tiar ki tar kiba thymmai ryngkat bad ka Blood Bank.
Ula kyrpad ia u Lat ka jylla ba yn shimkhia lem da kaba phah ia katei ka jingtyrwa sha ka Ministry of Doner lyngba ka Planning Department, jong ka sorkar Meghalaya na kabynta ban ai jingmynjur noh kham kloi.
