Shillong Nailur 23: U Myntri ka tnad Animal Husbandry & Veterinary Sanbor Shullai ha ka sngi Baar, ula leit iakynduh ia u Myntri Rangbah ka Assam u Himanta Biswa Sarma ban pynpaw ia ka jingsngewlem halor ka jingkhlad noh jong u nongrwai ba pawnam na Assam u Zubeen Garg.
U Bah Shullai, uba dei ruh u nongialam ka BJP bad u MLA na South Shillong, ula ong ba ka jylla Meghalaya ka iasnohkti lang bad ka Assam bad ka thain baroh kawei ha kaban leh burom ia ka jingkhlad noh jong utei u nongrwai bapawnam.
Ula ong ba u Garg udei u briew uba don shisha ia ka sap ka phong kaba tbit bad uba la aiti iala ka jingim ha kaba iadei bad ka rwai bad ka tem ka put bad ula iehnoh shadien ia ka matti jongka jingriewspah ka ri ha kaba iadei bad ka kolshor tynrai.
Lyngba ka kam rwai ka jongu ula tei ia ki jingkieng kiba la pyniasoh bad ki jylla bapher bapher bad wanrah ia ka mynsiem jong ka thain shatei lammihngi ha ki rynsan jong ka ri bad ha ka pyrthei.
“Kum shi bynta jong ka sorkar Meghalaya bad ki paidbah jong ka jylla Meghalaya, nga phah ia ka jingsngewlem sha ki bahaiing bahasem, ki paralok ki parajor bad sha ki nongsngap bad ki nongieid ia ki jingrwai ki jongu. Ki jingrwai ki jongu kidei kiba la ai mynsiem ia kiba bun ki nongrwai bad ki nongtem na ka jylla Meghalaya, kiba ka sngewsih ruh ia ka jingkhlad noh ka jongu” la ong u Myntri Sorkar.
“Ai ba u Blei Trai Kynrad un ai bor ia ki bahaiing bahasem bad un ai ka jingjah thait kaba junom ia ka mysniem kaba la duh noh. Ai ba ki kam kiba khraw kiba ula leh kin iai bteng ban ai mynsiem ia ki nongrwai bad ia ki riewieid jingrwai ha ki pateng ban dang wan. Ai ba ka mynsiem ka jongu kan leit suk bad ba ki bahaiing ki jongu kin kin ioh ia ka jingkhlain bad jingpyntngen ha kum kane ka por kaba ki mad ia ka jingeh” ula bynrap.
