Shillong Nailar 01: Ka Meghalaya Rural Tourism Forum ryngkat bad ki kynhun kiba pyniaid ia ki kam jngohkai hynne ka sngi Palei kila iakynduh ia u Myntri Rangbah ka jylla Conrad K Sangma bad Myntri kam jngohkai Bah Paul Lyngdoh, ban pynpaw iaka jingsngewkhia halor ka jingjia ha Umtyngar-ka jingjia ba shah khang bad shah pynphai ki nongjngohkai ha kawei ka sengbhalang.
“Ngi lah dep ban pynrem jur ia katei kaj ingjia bad ngi la kyntu iaka sorkar jylla ba kan shimkhia ia katei ka kam ym tang kaba la jia ha Umtyngnar hynrei hashwa kane ruh kala don ka jingjia ha Shillong bad Ri Bhoi kaba la pynsheptieng ia ki briew ba kin wankai sha ka jylla Meghalaya. Ka dei ka kamram jong ka sorkar jylla ban pynthikna ba ki nongjngohkai kin ioh ia ka jingshngain haba ki rung ne leit ha kylleng ki bynta jong ka jylla Meghalaya” ong u Bah Allan West haba iakren bad ki nongthoh khubor hadien ka jingwan ai dorkhas ia u Myntri Rangbah ka jylla bad Myntri kam Jngohkai.
“Ia ngi hi, kiba don ha ki kam kiba iadeibad ka kam jngohkai ngi donkam tang ia kawei hi, kata ka long ban pynneh ia ka shongsuk shongshngain bad ban don iaka jingsuk kumta kadei ka kamram jong ka sorkar ba kan pynneh ia ka shongsuk shongshngain ha ka jylla khnang ba ka kam jngohkai kan nang kiew irat” ula ong.
Ula iathuh ba kim shym la pynpaw tang ia ka jingsngewkhia hynrei kila ai jingmut ruh kumno ban pynbha iaka jinglong jingman bad ha kaba iadei bad ka jingkit ia ka leit ka wan jong ki nongjngohkai bad kila kyntu iaka sorkar ba kadei ban pynheh bad pyniar iaka Kad liengsuin ha Umroi namar ka jingeh hi kaba mad kadei ba ka jylla ka dang shaniah tylli beit ha ka kad liengsuin kaba don ha Guwahati.
U Bah Allan ula ong ba ki dap da ka jingsngewtynnad halor ka jingpynmih ka Meghalaya High Court ia ka khubor kaba la bthah iaka sorkar jylla, sorkar pdeng bad iaka Airport Authority of India ban peit ba ki liengsuin kiba biang kum ka A-320 kaban kit 180 ngut ki briew kadei ban lah ban hiar hapoh Umroi Airport bad na ka liang u Myntri Rangbah ka jylla ula pynpaw ba yn sa shimkhia thikna bha ia katei ka mat.
“Lada ka sorkar jylla, sorkar pdeng bad ka Airport Authority of India ki iatreilang ngi thikna ba kine ki liengsuin kiba heh kin lah ban wan hiar ha Umroi ym tang ki liengsuin kiban pyniasoh bad ka Kolkatta hynrei wat bad kiwei pat ki nongbah kiba heh jongka ri kum ka Chennai, Mumbai, Bangalore bad Delhi. Lada ngi lah ban leh ia kane kumta kumba 80% na ka jingeh ha kaba iadei bad ka leit ka wan yn lah ban pyduna” ong u Bah Allan.
Ula iathuh ba kila ai jingmut ruh ia ka sorkar ba buh ia ki bor pahara ha ki jaka jngohkai kiba la dep ban ithuh kum ha Sohra, Dawki bad Amlarem.
“Ngi la ai jingmut ba dei ban buh da ki Tourist Police bad na ka liang u MYntri Rnagbah ula pdiang sngewbha ia kine ki jingai jingmut bad ka tnad jngohkai kan dang iaid shakhmat ha kaban pynkhreh ia kane ka jingai jingmut ka jong ngi. U Myntri Rangbah ula pynpaw ruh ban pyndonbynta lang ia ki samla na ki shnong bad ngi la ai jingmut ban shim ruh iaka jingkyrshan na ki Village Defence Party hynrei ngi la banjur pat ba ki samla kiba la shah shim kum ki Tourist Police kidei ban long kiba la tbit kumba long ki Tourist Police ha Thailand bad Singapore” ula ong.
