Shillong, Jylliew 05 : U Myntri Rangbah ka Jylla Conrad K Sangma, ula ai ka jing kular ba un shimkhia ha ka ban pynurlong ia ki jingangnud jong ki paidbah ka Ri-Bhoi District ban ioh ia ki kam pynroi bapher bapher ha Nongpoh bad ka Ri-bhoi District baroh kawei.
U Myntri Rangbah ula ai ia kane ka jingkular ha ka jingiakynduh bad ki Nongialam ka National People’s Party (NPP)-Nongpoh Block, hynne ka sngi, kiba la iakren halor ki kam pynroi kiba dang donkam hapoh ka Nongpoh Constituency bad ka Ri-Bhoi District.
Ia kane ka kynhun ka NPP na Nongpoh la ialam da ka MDC ka Nongpoh Kong Rona Khymdeit ryngkat u President ka NPP Ri-Bhoi Babu Clement Mawlong ha ka jingiadon ryngkat u Nongaibuit ka NPP Ri-Bhoi Bah Thomas Malai bad u Working President ka NPP-Nongpoh Block Bah Rayonald Kharkamni.
Ka MDC bad ki Nongialam ka NPP na Ri-Bhoi, kila pynsngew ia shibun ki jingdonkam kiba iadei bad ka roi ka par hapoh ka Nongpoh Constituency kaba dei ka Headquarter ka District lem bad kiwei kiwei ki jaka ha Ri-Bhoi kynthup ka jingpynbit pynbiang ia ka jingdonkam u paidbah kaba manla ka sngi.
Ka MDC kala pynsngew ruh hakhmat u Myntri Rangbah ia ki dorkhas ba kala dep ai, kiba batai ia ki kam pynroi ba donkam hapoh ka constituency ha kaba u Myntri Rangbah ula kular ban shimkhia ban bishar bad pynurlong noh ia ki.
Ha kane ka jingiakynduh, la iakren ruh halor ka jingdonkam ban nang pynkhlain ia ka NPP ha Nongpoh bad ha Ri-Bhoi District baroh kawei.
