Shillong, Nailar 12: Ka Sorkar Jylla kala pan shuh shuh ia ki bor pahara ban pynkhlain ia ka jingpahara ha ki jaka khappud namar ka jingsynjor ka synshar khadar bad ka suk ka sain ha Ri Bangladesh nalor ka jingpyrshang jong ki briew ban wan prong tuh shapoh ka ri India.
HHM @AmitShah ji today reviewed the ongoing situation in Bangladesh and its implications for the North East. The concerns and apprehensions of our people were raised during the meeting. GoI is committed to keeping our borders safe and appeals to all to maintain peace & harmony. pic.twitter.com/R3qjdwq2Cs
— Conrad K Sangma (@SangmaConrad) August 12, 2024
“Ngi la kyrpad ia ka Sorkar India lyngba u Myntri kam Pohiing ba, lada donkam, ai shuh shuh ia ki bor pahara ban pynkhlain ia ka jingpahara ha khappud” ong u Myntri Rangbah ka Jylla Conrad K Sangma hadien ka jingiakynduh ia u Myntri kam Pohiing ka Ri Amit Shah ha Ndew Delhi, ban iakren halor ka jinglong jingman hapoh ki jaka khappud.
“Ia kane, u Myntri kam Pohiing ula pyntip ba un sa shong bishar ia kaei kaba long ba man bad ka jinglong ka suk ka sain bad ban sa shim ruh iaki sienjam kiba donkam” ong u Conrad.
Ia u Myntri Rangbah ka Jylla la synran da u Symbud Myntri Rangbah ka Jylla ba khmih ia ka tnad kam Pohiing Bah Prestone Tynsong ha kane ka jingialang.
U Conrad u pyntip ruh ba ha kane ka jingialang, kila batai bniah ruh ia u Myntri kam Pohiing ba ki BSF bad ki shipai kila treikam bha bad kila peit pyrman bha ia ki jaka khappud nalor ki Pulit ka Jylla Meghalaya ruh kumjuh.
“Ngi la pyntip ruh ia u ba ngi la pynjari da ka korphiw miet ha shilynter ki jaka khappud ka Bangladesh ban nang pynkhlain ia ka jingpahara bad ka jingshngain jong ki shnong khappud” ong u Myntri Rangbah haba bynrap “ Ngi la iai ban ia u Myntri kam Pohiing ka Ri ba ngim dei ban ailad ha kane ka khep ia kino kino ki briew ba kin jam ia u khappud namar ka dei ka kam iap kam im bad ngi la iakren sania bha ia kane ka bynta”.
U Myntri Rangbah u pyntip ba u Myntri kam Pohiing ula kren shai ba ka Sorkar India kan nym ailad ne shah satia ia kino kino ki briew ba kin wan jam na shiliang pid bad kala shim ruh ia baroh ki sienjam ban pynthikna ba ki khappud kin dei kiba la pahara bha khnang ba kan nym don ka jingiarung iamih ha khappud.
