Shillong, Nailar 12: Ka Hima Mylliem ka la rai ban leh da kaba tyngeh ia ki briew kiba pynkhein ia ka hukum ba khang ban sahmiet hapoh ïewduh, bad kumjuh ia kiba pyniakhalai.
Ia kane la pyntip da In-charge ka Thanat Mylliem Bah Sainbor Nongkhlaw haba iathuh ba ki Pulit ka Hima kila dep phah iaka kaiphod sha u Syiem ka Hima Mylliem.
Lah ban kdew ba haka 9 tarik mynta u bnai, ka Hynniewtrep Youth Council (HYC) kala leit khynra ha Iewduh bad ka la shem ba don ki briew kiba sah miet ha dukan, nalor ka jingpynialeh khalai.
Haba kren sha ki lad pathai khubor u Bah Sainbor ula ong ba ka Hima Mylliem kala dep ban pynduh ban ai No Objection Certificate (NoC) ban shah sahmiet haki dukan. U pyntip ba ki pulit ka Hima ki la ithuh ia ki dukan ba pynlong jaka sahmiet bad shim ruh ia ka kyrteng jong ki briew hadien ka jingleit khynra ka HYC.
“Haka jingshisha ki bor pahara ka KHADC bad Hima Mylliem naka por shaka por ki ju pynlong ia ka jingiaid pahara ha Iewduh hynrei ki don beit ki briew ba shim kabu, bad naka liang ka Hima kan sa shim daki sienjam ba tyngeh nangne shakhmat lada dang don kiba sah miet ne pyniakhalai” ong u Bah Sainbor.
U Bah Sainbor ula iathuh ba katkum ka jingtip jong ki Pulit ka Hima Mylliem, ki don tang 2 tylli ki dukan ha Iewduh kiba ioh jingbit ban sahmiet na ka Hima.
