Shillong, Kyllalyngkot 07: Ka Nangkiew Irat SC bad ka Rangdajied United FC kila iakhiad da 0-0 ha ka jingiakhun ha ka OC Blue Shillong Premier League 2024 kaba la long ha SSA Stadium, First Ground, Polo, hynne ka sngi Baar.
Napdeng ki 38 sien ki jingiakhun ha ka SPL, kane kadei ka jingiakhun ka baar kaban mad ia ka jingiakhaid khlem ka jinglah ban thep kol bad kane kala jia kadei namar ka jingia ryngkat bor ha ka rukom ialehkai jong kitei ki ar tylli ki kynhun.
Kane ka jingiakhaid kala pynlong ia kitei ki ar tylli ki kynhun ban ioh mar 13 point hynrei ka RUFC kala wan ha ka kyrdan ka balai katba ka Nongrim Hills kala don ha ka kyrdan kaba 4 bad ka Nangkiew Irat kala wan ha ka kyrdan kaba san.
Kane ka jingiakhaid kala pyndiaw ia ka Rangdajied, kaba la bteng ban khur ia ki jingjop ha ki 4 sien jong ki jingiakhun ki jongka ha ka SPL.
Ka RUFC mar ia sdang kala ialehkai bha ha kaba u Benny Vianney Khriam ha ka minit kaba 10 ula shut ia ka bol hynrei kala leit dei ia u dieng kol bad mih noh shabar bad kadei tang kane hi ka kabu kaba biang tam ban ioh thep kol ha ka kylla step namar ha ka kylla miet ka jingiakhun kam shym la long kaba itynnad haduh katta katta.
Ka Nangkiew Irat ruh kala ioh ia ka kabu ha kaba u Wallamsuk Nongkhlaw uba la mareh na jngai ula ioh ban pynshad ia u nongap kol ka Rangdajied u Meshan Banjop Sumer hynrei ha ka por ba ula shut ia ka bol na jngai kam shym la leit rung shapoh kol.
Ka jingiakhun ha ka sngi Balang kan long hapdeng ka Mawlai SC pyrshah ia ka Langsning FC ha ka por 2:30 mynsngi.
