Tura, Kyllalyngkot 07: Ka jingiania hapdeng ki nongdie kwai kala lam sha ka jingiashoh iadat ha kaba uwei ula khlad noh ha katei ka jingjia, kaba la jia hynne ka sngi Baar, ha Supermarket kaba don mar pyrshah bad ka MTC Bus Stand ha Tura.
Katkum ka khubor na ki pulit, kila iathuh ba katei ka jingiania bad jingiashrut kala sdang ha ka por kumba 11:32 mynstep bad kane ka jingiania kala nang khluid bad kala mih syndon ka jingiashoh ia dat.
Ha katei ka jingjia, uwei u nongdie ula shah thombor da ka wait bad ula mynsaw jur bha ha ka bynta jong ka kpoh.
Ki ar ngut ki briew kiba la iashoh iadat la tip kyrteng kum Minurul Islam, 24 snem ka rta bad u Jaha Uddin kiba dei shi Kni shi Pyrs bad kiba shong basah ha Risipara ha Tura.
Ia u Jaha Uddin uba la mynsaw jur, la pynkit noh mardor sha Tura Civil Hospital hynrei ula khlad noh namar ka jingjur palat jong ka jingmynsaw hashwa ba yn ioh ia ka jingsumar.
Ki Pulit kila poi mardor ha katei ka jaka bad kila kem noh ia u Minurul Islam bad kurup ruh ia ka wait kaba ula pyndonkam ha ka jingiashoh ia dat.
Ki pulit ki dang pynlong ia ka jingtohkit ban lap ia ka daw tynrai halor katei ka jingjia kaba la pynlong ba kin ia shoh ia dat bad poi syndon sha u pud ban duh ia ka jingim briew.
