Shillong, Kyllalyngkot 07: Ki shipai BSF ha ka sngi Nyngkong, kila ioh ban pynpulom ia ka jingthmu ban khaii ia ki mar bad ia ki tiar ki tar kiba kot T.34.15 Lak sha ka ri Bangladesh.
Kine ki mar kiba la ioh kurup noh da ki BSF ki kynthup ia ka shini, ka kyiad, ki nep syaid, ki rynsun, ki jingtah pynbhabriew bd ki dawai dashin kiba la thmu ban khaii tuh sha ri Bangladesh.
Ki BSF kila pynpaw, hadien ba kila ioh ia ki jingtip kiba paka, kila pynlong ia ka jingkhynra ha ka shnong Muktapur bad Lynghat kiba hap hapoh ka West Jaintia Hills. Ha katei ka jingkhynra, ki shipai BSF kila sakhi ia ka jingdon jong ki briew kiba wan ban tur ban wan shim ia kitei ki mar bad ki tiar ki tar ban khaii tuh. Haba pyrshang ban kthong ia ki, kitei ki briew kila phet krad shapoh khlaw da kaba shimkabu ia ka jingdum. Haba pynlong ia ka jingwad bniah ia katei ka khlaw, la lap ia ki mar bad ia ki tiar ki tar kiba thmu ban khaii tuh.
Ia kitei ki tiar kiba la ioh kurup la aiti noh sha ka tnad Custom ba kan leh shuh shuh ia kaba donkam katkum ki lynti jong ka ain.
Ki BSF kila pynpaw ba kin iai long kiba peitngor bad kiba ieng ban iada ia ka thain khappud bad ban tehlakam ia ki kam khaii tuh bad kin trei shitom ban rat dyngkhong ia ki kam sniew bad ban pynneh ia ka shongsuk shongshngain ha ka thain khappud.
