Shillong, Naitung 26 : Ka Commissionerate of Food Safety, Health & Family Welfare kala pynmih ia ka jingmaham ha baroh kawei ka Jylla na ka bynta kane ka aiom lyiur, haba kyntu ia ki paidbah ba kim dei ban bam tit khlaw bad ban pynthikna ba ki tyllong um ki dei ban lait na ki jingpynjaboh da ki kynja dawai.
Kane ka jingmaham kala mih hapdeng ka jingkiew ka jingngat bih na ka jingbam tit khlaw bad ka jingjur ka jingsngewkhia halor ki jingjaboh ki wah, ki wahduid bad ki umpohliew na ki kynja dawai ba tuid na ki jaka rep.
Ki Ophisar kila ong ba ka jingkylla ha ka jinglong ka suinbneng-ka jinghap slap ba bym thikna, ka jingkylla ka jingshit bad jingkhriat- kala pynkylla ia ka jingheh jingsan ki tit. Wat ki tit ba ju iabam ha Jylla ki lah ban don ia ka bih.
“Kam don satia ka jingbatai kaba suk ban ong la u tit khlaw u long uba shngain” ong ka jingbthah. La kyntu ia ki nongshongshnong ba kin kiar na ka jingleit kheit tit bad ban thied ia u tit tang na ki jaka bala pynshisha bad ba shu rep.
Ka Tnad kala maham ruh ia ki nongrep bad ki nongshongshnong pyrshah ia ka jingpyndonkam, ban sait lane theh ia ki dawai pyniap khniang hajan ki wah, ki wahduid bad ki umpohliew.
Da ka jingjur u slap, ki dawai ki lah ban tuid kloi kloi bad pynjaboh ia ki umdih.
La bthah ia u Deputy Commissioners, DM&HOs, BDOs, Food Safety Officers, bad ki bor shnong ba kin pynsaphriang ia kane ka khubor lyngba ki jingpynbna, jingialap bad ki lad pynbna ba ki don ha shilynter ka lyiur.
Ka Sorkar Jylla kala kyntu ia baroh ba kin bud ia ki kyndon khnang ban lait na ki jingpang bad iada ia ka koit ka khiah u paidbah bad ki tyllong um ha kane ka por slap.
