Guwahati, Risaw 23: Ka tnat shipai ka la hukum ban pynlong ia ka jingtohkit da ka iingbishar ban lap ia ka daw halor ka jinghap jong ka liengsuin Advanced Light Combat helicopter (ALH)) jong ka tnat shipai Indian Army kaba la jia ha ka sngi Thohdieng ba la lah ha Upper Siang District ka Arunachal Pradesh.
Ka jingwad bad ka jingleit pyllait im ka la kut noh da ka jinglapdien ia baroh ki santylli ki metiap jong ki nongshong liengsuin, ong ka khubor heh sorkar hynnin ka sngi Saitjain.
Kane ka jinghap liengsuin kala jia ha kane ka step sngi Thohdieng ba la lah hapoh ka shnong Migging kaba jngai kumba 25 km na ka district headquarter.
Kane ka liengsuin helicopter kaba la mih na Likabali (ha Assam), ka dang don’ hapdeng ka jingleit kaba man la ka sngi hadien ba ka la hap noh ha katei ka jaka.
Ki khubor ki iathuh ba u nongaiktien ka tnat shipai u Lt. Col Mahendra Rawat ula ong ba ka jinglong jingman jong ka suinbneng ka long kaba biang bha na ka bynta ka jingpynher liengsuin hynnin ka sngi Saitjain.
Ia kine ki liengsuin la sdang pyntreikam ha kane ka thain naduh u bnai Jylliew 2015…Shwa jong katei ka jinghap na ka liang ka Air Traffic Control kala ioh pdiang ia ka jingpan jingiarap kaba pyni ruh ba ka don ka jingthud hapoh jong ka liengsuin, ula ong shuh shuh.
Ia kine ki dkhot ka tnat shipai kina la khlad noh ki dei kiba la tip kyrteng kum u Maj. Vikas Bhambhu, Maj. Mustafa Bohara, CFN Tech AVN (AEN) Aswin K V, Hav(Opr) Biresh Sinha, NK(Opr) Rohitashva Kumar.
Halor kane ka jingjia ba sngewsih na ka liang ka tnat Indian Army ka la pynpaw ka jingsngewlem sha kiba haiing hasem jong kine ki lanot, ong u Lt. Col Rawat.
Na ka liang u myntri rangbah ka Arunachal Pradesh u Pema Khandu ruh lyngba ka twitter ula pynpaw ka jingsngew kyndit kaba khraw ha kaba iadei bad kane ka jingjia hap liengsuin hapoh Upper Siang district ka Arunachal Pradesh.
Kumjuh na ka liang u myntri ka sorkar pdeng u Kiren Rijiju ruh u pynpaw ka jingsngewlem ha kaba iadei bad kane ka jingjia.
Kane ka jinghap jong ka liengsuin shipai ka dei ka sien kaba ar tang mynta u bnai ha Kane ka jylla.
Ha ka 5 tarik mynta u bnai kawei ka liengsui Cheetah helicopter ka la hap khyndew noh katba ka dang do hapdeng ka kam ha ki bynta ba shakhmat jong ka Tawang.
