Shillong, K’Lyngkot 20: Ka tnat pulit pyniaid kali ka Shillong Traffic Police (STP) hynne ka sngi kala pynmih hukum ba ki trai kali kidei ban weng noh iaki Silencer pait ktang (Exhaust Pipes) bad kidei ban pyndonkam tang da kiba la don lypa (Original Exhaust Pipes).
Ka kyrwoh na u East Khasi Hills Superintendent of Police (Traffic) u Vikash Kumar ka kdew ba ka tnat Pulit kala ioh jingujor ba ki don bun tylli ki kali bad ki arshaka kiba pyndait daki Silencer pait ktang (Exhaust Pipes) ba shu shna hi bad kane ka long beain katkum ki kyndon ka 182A (4)/190(2) of Motor Vehicle Act, 1988.
La ong ba kane ka jingpyndait iaki Silencer (Exhaust Pipes) ba shu shna hi ka pynthut iaki paidbah bad dei namar kane la bthah ia baroh ki trai kali ba kidei ban weng mardor.
Ka hukum ka kdew ruh ba kino kino ki trai kali ki bym bud ia kane ka hukum kin shah pynngat bad shah pynshitom katkum ki kyndon ka 182A (4)/190(2) of Motor Vehicle Act, 1988.
