Guwahati, Risaw 31 :Ka sorkar Assam kala pynmih ia ka hukum ban tehlakam ia kino kino ki jingpyrshang pynkylla niam hapoh ka jylla hadien ba kala ioh ban kem bad pynphai pat ia 27 ngut ki briew kiba na shabar jong ka ri, kata kaba kynthup ia 17 ngut ki nong Bangladesh bad laingut ki nong Sweden bad hynniew ngut ki nong Germany tang hapoh kine ki hynriew taiew ba la dep, kata hadien ba ka lap ia ki ha ka por ba ki dang ialap niam da kaba pynkhein ia ki kyndon kiba iadei bad ka visa.
“Ngi la hukum ia ki superintendent of police jong baroh ki district ban long kiba peitngor haba don kino kino ki jingialang lehniam kaba ia don bynta lang da ki briew kiba na shabar jong ka ri, bad la ki don ne em ia ka visa kaba dei biang.Ki SP kila ioh iaka jingbthah ban pynthikna ba ki briew kiba na bar ri kim lah satia ban iashim bynta ha ki jingialang pynkylla niam wat lada kine ki briew ki don ryngkat bad ki ia ka missionary visa,” ong u special DGP (law and order) u GP Singh.
“Na ka liang u Myntri Rangbah (CM) ka Assam ula pynshai ha ngi ba kim dei ban don kino kino ki jingtreikam ba beain ha ka jylla,” ula ong shuh shuh.
U Singh ula ong ruh ba kila bishar bniah ha kaba iadei bad ka jinglong jingman. Tang ha kine ki shi bnai ba la dep, haduh 17 ngut ki nong Bangladesh, lai na Sweden bad hynniew na Germany la shem ba kila pynkhein ia ki kyndon kiba iadei bad ka visa da kaba iashim bynta ha ki jingialang pynkylla niam katba ki dang don da ka visa jong ki nongwan shangkai pyrthei,” ong u Singh.
Kitei ki 17 ngut ki dkhot na Bangladesh kila wan poi ha Baghmari hapoh Biswanath district ha ka 13 tarik u Nailur ba la dep lyngba ki 13 tylli ki bus napoh Cooch Behar kaba hapoh West Bengal. Kine ki nong Bangladesh la shem ba kila wan ialap beain ia ka niam Islam ha ka 19 tarik u Nailur ba la dep.Ia kane ka kynhun la lamkhmat da u Syed Ashraful Alam bad kiwei pat ki dei ki nongbud ki jong u.
Kumjuh ki laingut ki nong Sweden ia kiba la shem katba ki dang iashim bynta ha ka jingialang leh niam da kaba pynkhein ia ka kyndon ain kiba iadei bad ka visa hapoh Dibrugarh district ha kane ka taiew ba la lah hadien ba la pynkynriah noh ia ki ha ka sngi kaba bud.
Shuh shuh ki hynniew ngut ki nong German kila shah kem noh ha ka sngi Thohdieng ba la lah napoh ka resort ha Kaziranga namar ka jingpynkhein ia ki kyndon visa da kaba leh ia ki kam ialap niam.Ia kine la pynkynriah noh sha Delhi ha ka sngi Saitjain ba la lah na ka bynta ban pynphai pat sha la ka jong ka ri.
