Kohima, Risaw 31: Ka President Droupadi Murmu kan pynlong ka jingwan jngoh ba ar sngi ia ka Nagaland ha ka 2 bad 3 tarik u Naiwieng 2022, ka ban dei ruh ka sien wan jngoh kaba ar jong ka ia kane ka thain shatei lammihngi (Northeast) hadien ba kala shimti kum ka president jong ka ri, ong ka khubor heh sorkar ha ka sngi Thohdieng ba la lah.
Nalor kata kila ong ruh ba ka president kan iashim bynta ruh ha ki katto katne ki jingialang, katba na ka liang ka sorkar kan pynlong ia ka jingialang pdiang sngewbha hapoh Capital Cultural Hall ha Kohima ha ka 2 tarik u Naiwieng 2022.
Na ka liang ka sorkar jylla kala khot sngewbha ruh ia ki sawngut ki president jong ka party lem bad kiwei pat ki nongialam na ki 22 tylli ki kynhun seng jong ki trai shnong riewlum da kaba deng ruh ryngkat ia ki jain tawah tynrai jong ki.
Kham hashwa na ka President Murmu kala pynlong ka jingwan jurip ia ka Tripura ha ka 12-13 tarik u Risaw 2022, bad ia ka Assam ha ka 13-14 u Risaw 2022 da kaba iashim bynta ruh ha kaba buh ia ki mawnongrim na ka bynta ki projek kam pynroi bapher bapher.
