Agartala, Risaw 31 : Ki dkhot ka Tripura Youth Congress ha ka sngi Saitjain ba la lah kila pynlong ka jingiakhih hakhmat ka iingsah jong u Myntri Rangbah (CM) ka jylla u Manik Saha shibynta ban pynpaw pyrshah halor ki jingjia kam pyntriem pyrshah ia ki kynthei bad dawa ruh ban kem mardor ia u khun jong u Bhagaban Das uba dei u myntri ka tnat labour halor ka jingkynnoh donkti ha kaba iadei bad ka jingshah leh beijot jong ka khynnah 16 snem ha Kumarghat hapoh Unakoti district kaba la jia ha ka 19 tarik u Risaw 2022.
Shibun bah ki dkhot ka seng Congress kila khang lynti hakhmat ka iingsah jong u CM ka Tripura da kaba rah ruh ryngkhat ki jingthoh kiba kynnoh pyrshah ia u CM halor ka jingai jingiada ia u briew uba la shah kynnoh donkti hakhmat eh ha katei ka kam leh beijot.
Na ka liang u president ka Youth Congress, u Rakhu Das ula kynnoh ba ki don ia ki sakhi satar kiba biang ban pynshisha halor ka jingdonkti u khun jong u Bhagaban u Chandra Sekhar halor katei ka jingshah leh beijot jong katei ka khynnah ha ka kynhun ki runar, kata kaba kynthup ia ki sakhi satar lyngba ki digital halor ka jingdon ka jong u ha katei ka jaka bala jia katei ka kam pyntriem.Hynrei na ka liang ka sorkar kala pyrshah ban pynjah rngai ia kine ki sakhi satar khnang ban iada ia kine ki riew bymman.
“Na ka liang ki pulit kila dep ioh ia baroh ki sakhi satar, kata kaba kynthup ia ka jaka kaba u Chandra Sekhar u don lyngba ka mobile phone, hynrei kim lah ban pyniaid shakhmat namar ka sorkar synshar BJP lem bad u CM ka jylla kila khanglad ia ki ba kin leh iala ka kamram khnang ban iada iala ka burom,” ong shuh shuh u Das.
