Shillong, Risaw 31 : Ka Meghalaya State Pollution Control Board (MSPCB) kala ai ia ka hukum sha ka Project Management Unit-Mylliem, ba pyntrei ia ka surok Shillong-Dawki ba kan shim ia ki sienjam ha kaban weng noh mardor ia ka khyndew bad ki jaboh jabain ba mih na ka jingpyntrei ia ka surok ba la pyntuid sha ka Wah Umngot.
Ha ka shithi bala ai sha u General Manager (P) Project Management Unit-Mylliem ha ka sngi Thohdieng, u Chairman ka MSPCB R Nanamalai ula ong “ Mynta, namar kata, haba pyntreikam ia ka bor bala pynkup ha ka kyndon 5 jong ka Environment (Protection) Act, 1986, la bthah kumne harum : ban pynthikna ba dei ban bud pyrrkhing ia ka Standard Operating Procedure kumba la pynpaw ha ka S.O.1223 (E) ba 17 tarik Lber, 2025, bad ban leit weng mardor ia ka khyndew bad ki jaboh ba bret sha ka wah Umngot”.
Ka Board kala bthah ruh “…baroh ki contractor ki dei ban aplai ia ka Consent to Establish/Consent to Operate na ka Board hapoh ka 15 sngi”.
La bthah ruh ia ki contractor ba kin pyntreikam pyrrkhing bha ia ka Meghalaya Stone Crusher Order No. FOR.60/2008/Pt-I/17 ba 23 tarik Nohprah 2021 – khamtam haba iadei bad ka thymmei jong ki maw ba ki pyndonkam.
Ia kine ki jingbthah la pynmih hadien ka jingleit jurup da ki Nongtrei ka Board ha ka sngi Thohdieng (31 tarik Risaw), kaba pynpaw ia ka jingtih maw kaba jur, ka jingtih khyndew bad ka jingkynton khyndew bala shu bret harud ka surok Shillong-Dawki (kaba dang pyntrei bad phiah ha ki san tylli ki song) khlem ki lad ban pynthikna ba kin ym tuid.
Ka jingjurip ka shem ruh ba ynda la jam ia ka Jingkieng Pynursla-Dawki, ka NHIDCL kala pyndap ia ka surok kaba la twa dang shen.
“Ka jingpyndap khyndew la leh khlem ka jingtei kynroh kum ka jingbuh da ki byrni shyiap lane kiwei kiwei ki lad ban pynskhem. Namar kata, ka khyndew ba pyndap la shem ba kala tuid sha ka Wah Umngot, kaba la nang buh jingma shuh shuh ia ka jingshah rong ka khyndew” ong ka Board haba bynrap ba ka bynta ba pyndap hajan ka jingkieng la I kum kaba synjor bad ka lah ban twa biang khamtam ha ka por ba slap.
Ka jaka ba pyntrei ia ka jingkieng Dawki ba thymmai ruh la shem ba kala synniang sha ka jingpyn jaboh ia ka wah namar ka jingtih ia u lum bad ka khyndew kala tuid nalor lum sha ka Wah Umngot.
Ka Wah Umngot ha ka thain Shongpdeng la shem ba kala kylla rong ktieh bad jngut bha ha ka por ba leit jurip.
Haba tohkit na ki trai shnong, la pyntip ba kane ka Wah kala kylla jngut naduh ki bnai bala leit noh.
Ka MSPCB kala lum sakhi ruh iaka um na ka wah Umngot ban tohkit ha ka Laboratory.
Ha ka jingiakren bad u Bah Trebor Suchen ha Darang, la pyntip b aka tyllong jong ka jingjngut ka um ka mih na ka wah Umsong, kabadon ha ka thain Laitlyngkor (package II jong ka project).
La iathuh ba bun bah ka khyndew la shu theh hajan jong kawei na ki wahduid jong ka Wah Umngot, kaba lah ban synniang sha ka jingktieh bad jngut ka wah sha ki bynta ba sharum, ong ka Board.
Ia kine ki jingbthah la pynmih hapoh ka kyndon 5 jong ka Environment (Protection) Act, 1986, bad la bthah ia ka Project Management Unit-Mylliem ba kan aiti ia ka action taken report ne ka kaiphod ba pyni ia ki kam ba kala leh halor kane ka bynta, kham kloi kat kaba lah.
 kala ai ia ka hukum sha ka Project Management Unit-Mylliem, ba pyntrei ia ka surok Shillong-Dawki ba kan shim ia ki sienjam ha kaban weng noh mardor ia ka khyndew bad ki jaboh jabain ba mih na ka jingpyntrei ia ka surok ba la pyntuid sha ka Wah Umngot.){kind=link}