Nongstoin, Nailur 23 : Ka Iingkashari Special Judge (POCSO) kala hukum ban set along haduh 10 snem ia u runar uba thmu ban leh beijot ia lai ngut ki heprit ha ki artylli ki jingjia kiba jia ha West Khasi Hills.
Une u runar u dei uba la tip kyrteng u Alvin Nongrum uba la shah kem ha u snem 2017 bad shah pynngat ha ki kyndon jong ka Ain POCSO Act 2012, pyntip u Superintendent of Police ka West Khasi Hills District.
Ha kawei ka jingjia, une u runar ula pyrshang ban leh beijot ia arngut ki heprit ba dei shipara kiba dang 5 snem bad 10 snem ka rta hala ka jong ka Iingsah. Kane ka jingjia kala jia ha u snem 2017 ha kaba la register case ia u ha Nongstoin Police Station Case No.54 (05) 2017 hapoh ka kyndon 9 (m) /10 POCSO Act bala pule lang bad ka kyndon 506 IPC.
Ka Iingkashari Special Judge (POCSO) Bah B Laitmon, ha ka 20 tarik Nailur kala pynmih ia ka hukum ba pynngat jingpynsajia (convict) ia une u runar hapoh ka kyndon 10 jong ka POCSO Act 2012 bad la hukum ban set along 5 snem ha ryngkat ka kuna ba T. 15000 haba ong ba lada ym lah siew ia ka kuna, un hap ban shong tam sa lai bnai ha along.
Nalor kane ka kam bymman, une u runar ula shah kem ruh hapoh ka kyndon ain POCSO halor ka jingpyrshang ban leh beijot sa ia iwei I heprit ba dang 5 snem ha une u juh u snem kata ha u 2017.
Ki Pulit kila register case ia u ha Nongstoin Police Station kat kum ka case no. 63 (05) 2017 bad la pynngat ia u ha ka kyndon 9 (m) /10 POCSO Act 2012.
Ka Iingkashari I Bah Laitmon ha ka 20 tarik Nailur, kala pynmih ia ka hukum ban pynngat jingpynsajia ia une u runar hapoh ka kyndon 10 jong ka POCSO Act bad hukum ban set 5 snem ha along ha ryngkat ka kuna ba T.15000 haba ong ruh ba lada um lah ban siew ia ka kuna, un hap ban shong along sa lai bnai.
