Shillong, Lber 21 : Ka Iingkashari Meghalaya High Court ha ka sngi Thohdieng, kala hukum ia ki bor ka Sorkar Jylla ba kan shim ia ka sienjam ban pynshitom pyrshah ia ki nongthied masi lada jia ba ki pynkhein ia ka Prevention of Cruelty to Animals Act, 1960.
Haba pynwai ia ka writ petition, ka Iingkashari bala khlieh da u Chief Justice IP Mukerji kala ong “Namar ka hukum ba 26 tarik Jymmang 2023 ba pynwai ia ka writ petition ba hashuwa (PIL No 2 of 2021), ym donkam shuh ban pynmih ia kawei pat ka hukum ha ka mukotduma lait noh tang ka jingbthah ia ki bor ba dei khmih ba kin bud pyrrkhing bha ia ka hukum ba 26 tarik Jymmang 2023 bad ruh ban pynthikna baki nongthied masi kin bud pyrrkhing ia ka Act bad ka Rules bad ba ki bor Sorkar ki dei ban shim iaka sienjam ban pynshitom lada jia ba pynkhein ain”.
Kane ka mukotduma ka dei kaba la mudui da ka Dhyan Foundation-ka Non-Governmental Organisation bad ka Tankala Naga Chandrani kiba mudui pyrshah ia ki artylli ki hukum jong ka Jylla ba 21 tarik Nohprah, 2018 bad 8 tarik Rymphang, 2019.
Kine ki hukum ki kren halor ka jingithuh bad pynkha ia ka Gaushala ban buh ia ki masi bad ki jingri jingdup bala ioh kurup da ki bor Sorkar ha lane hajan ki jaka khappud ka Meghalaya bad Bangladesh, kiba thmu ban khaii tuh.
Ki nongmudui ki sngew ktah da ka kyndon ha kine ki hukum ba bthah ia ki borkhmih ba ki dei ban ioh ia ka hukum na ki bor ka Iingkashari ban die ia ki masi ba ioh kurup.
U nongiasaid ain jong ki nongmudui ula pynpaw ba lada ia ki masi la die, ki borkhmih kin ym lah shuh ban leh eiei ia kaei kaba u nongthied u leh ia kine ki masi bad ka jingiaid kat kum ka Act bad ka Rules.
Ia ka PIL No 2 of 2021-Gua Gyan Foundation vrs Union of India & Ors la pynwai noh da ka Division Bench lyngba ka hukum ba 26 tarik Jymmang, 2023.
