Tura, Nailar 28 : Arngut ki shipai Border Security Force (BSF) kila mynsaw jur na ka jinghiar thma kynsan kynsan jong ki nongkhaii tuh ka Bangladesh hynnin ka miet sngi saitjain ha khappud Rongara, kaba don ha South Garo Hills District.
Kat kum ka khubor bala pynthikna da u Superintendent of Police ka South Garo Hills, kine ki shipai BSF ki dei kiba iaid pahara ha khappud bad ki jaka ba jur ka jingiakhaii tuh bad la ka jong ka kynhun hynrei kynsan kynsan katba ki dang iaid pahara, ki nongkhaii tuh na Bangladesh kila thombor ia ki da ki wait bad ki tukri da kaba shim kabu ia ka jingdum jong ka miet.
Kne ka jingthombor kala jia ha ka shnong Rongara Matchakol, kaba don marjan bad ka khappud ka bym pat ker sainar shiah.
Ia kine ki arngut ki shipai ba mynsaw la ioh ban pyllait im da ki para shipai kiba la pynkit noh mar mar ia ki sha ka Hospital ha Rongara bad hadien la pynkynriah sha Baghmara bad nangne pat sha Tura Civil Hospital ba kin ioh ia ka jingsumar. La pyntip ba kine baroh arngut kila kham iohbor mynta.
Ka jingkhaii tuh ia ki masi na India sha Bangladesh ka dei kawei na ki jingeh kaba jur bha ha South Garo Hills District bad ki nongkhaii tuh na Bangladesh ki ju shalan pat ia kiwei ki mar sha India ba kynthup ia ki jain, ki jingdeng, ki tiar iing bad kiwei kiwei.
