Shillong, Jymmang 11: Hadien ba ka Khasi Hills Autonomous District Council (KHADC) ka la rai ban pyrshah ia ka jingot kilo iaki mar rep, hynne ka sngi ki Executive Member (EM) ka KHADC haka jingialam ka EM i-c Market kong Grace Mary Kharpuri, bah Teibor Pathaw, Jambor War bad u Syiem ka Hima Mylliem u Ainam Manik Syiem kila leit jurip ia ka Iewduh.
Ha kane ka jingleit jurip, ki dkhot ka EC kila iakren bad ki nongrep, ki ba wan die ia ki mar rep ha iew bad kila ia mynjur ban nym shah shuh iaka jingot kilo iaki mar rep kiba la wanrah hapoh Iewduh.
Haba kren ha kane ka sngi ka kong Grace kala iathuh ba ka KHADC kala shim iaka rai ban pynshitom tyngeh pyrshah iaki nongkhaii kiba bteng ban ot kilo iaki mar rep namar kane ka wanrah ka jingduh nong iaki nongrep ka jylla.
Ka kong Grace kala iathuh ba naka liang ka Hima Mylliem ka la pynmih ia ka hukum naduh u snem 2019 ba ymdei ban shah khate kilo ia ki mar rep ba pynmih da ki nongrep bad ia kane ka juh ka hukum la pynmih biang haka 10 tarik mynta u bnai ban khang ia kano kano ka jingot kilo iaki mar rep.
Kala iathuh ba kane ka jingleit jurip iaka Iewduh kadei ruh ban iakren bad ki nong die nongpet ha Iewduh ban pyntip ia ka rai ba la ai da ka Council ba kim dei shuh ban dang shah nion ne shah khate shuh kilo ia ki mar rep ba ki pynmih.
“Lada don mano mano ba dang bteng iaka jingot kilo iaki mar rep, ki nongrep kidei ban pyntip shaka KHADC lane shaka Hima Mylliem bad iaki ba donkti yn pynshitom katkum ki kyndon ka ain” la ong ka kong Grace.
Ha kane ka sngi la sakhi ruh ba ki nongkhaii ha ryngkat ka jingdon lang ki nongrep kila ia mynjur iaka rai jong ka KHADC bad ka Hima Mylliem bad haka juh ka por la ia mynjur ban iatreilang naka bynta ka jingmyntoi jong baroh ki nongshong Iew.
