Shillong, Jymmang 11 : U Deputy Commissioner ka West Khasi Hills District, ula ai khublei ia ka kynhun ki nongiakhun ia ka jingpang TB hapoh ka District halor ka jinglah ban ioh ia ka khusnam ha ka Sub National Certification for TB Elimination.
Ka West Khasi Hills District kala ioh khubor ia ka takma rynnong kum ka jingithuh ia ka jingtrei shitom ha ka jingiakhun pyrshah ban pynduh jait ia ka jingpang TB hapoh ka Jylla bad ka Ri hapoh u snem 2025.
Ia kane ka khusnam la ioh na ka Ministry of Health and family Welfare ka Sorkar Pdeng ha ka World TB Summit ba long ha ka 24 tarik Lber ha Varanasi, Uttar Pradesh. Kane ka dei ka jingithuh halor ka jinglah ban kynjoh haduh 20% ka jingpynduna ia ka jingiohpang TB. Ka District kala ioh ruh ia ka song pisa ba 2 lak tyngka.
Ka District kala aplai ia ka Sub-National Certification ha u snem 2022.
Kat kum ka kyndon jong ka Sub-National Certification, ki District kiba la kynjoh ia ka 40%, 60% bad 80% ha ka jinglah pynduna ia kiba iohpang TB haba nujor bad ka jingiohpang TB jong ki briew hapoh u snem 2015, kila ioh ia ka takma rupa bad ki District ki bym don shuh ki Nongpang TB kila ioh ia ka takma ksiar ha ryngkat ka khusnam ba 3 lak, 5 lak bad 10 lak.
