Shillong, Nailur 12: Ka Congress kaba don ha ka Liang Pyrshah ha Assam, ha ka sngi saitjain bala lah, kala leit hiar jurip ia ka Shnong Langpih ban iakynduh ia ki Nongshongshnong ban pynbor ba kim dei satia ban ailad ba ki jaka kiba don hapdeng ka jingiakajia, kin leit phai pat sha Jylla Meghalaya.
Ia kane ka jingjurip la lamkhmat da u Nongialam ka Liang Pyrshah u Debobrat Saikia ha ka jingiadonlang ka MLA ka thain Nandita Das, u Rakibul Hussain, u Joyram Sarma ha ka jingiadonlang u Circle Officer ka Boko Dibas Bordaloi, u APS Border DySP Hamirdur Rahar bad kiwei kiwei.
Kine ki kynhun na Assam kila wan da 22 tylli ki kali bad la synran ia ki da shi pyrton ki CRPF, shi pyrto ki Pulit Ka Assam Police Special Force, ki Heh ka Assam Forest Department bad ki Ophisar ka Assam APDCL Electrivity Division.
Kat kum ka khubor bala ioh la iathuh ba kine ki Nongthaw ain ka Assam bad ki Heh Sorkar kila leit ban jurip ia ki Shnong ba don hapdeng ka jingiakajia ha Langpih ba kynthup ia ka Shnong Mawsikar bad Mokebari.
Kine ki Nongialam ka Liang Pyrshah kila pynlong ruh ia ka jingialang paidbah ha Langpih Community Hall kaba la iashim bynta da palat 200 ngut ki Nongshongshnong ba kynthup ia ki Nepali, katto katne ngut ki Garo bad ki Khasi kiba shong shnong ha Langpih.
U Nongialam ka Liang Pyrshah Debobrat Saikia bad ka Nandita Das nalor u Rakibul Husain kila ban jur ia ki Nongshong shnong ba kim dei ban ailad ba wat shi inchi ka jaka jong ka Assam kan leit sha Meghalaya bad ban pyni ruh ia ka mon ba ki kwah ban don bad ka Jylla Assam.
