Shillong, Nailur 13 : Ka Committee on Environment jong ka Ïing Dorbar Thawaiñ ka Jylla hapoh ka jingïalam u Chairperson Bah Wailadmiki Shylla, hynne ka sngi Thohdieng, ka la hiar jurip ïa ki karkhana dewbilat bad karkhana Coke Plant kaba don ha East Jaiñtia Hills District ban bishar bniah ïa ka jingktah jong ki kam karkhana ïa ka mariang.
Kiba la iadonlang ha kane ka jingjurip ki kynthup ia ki dkhot ka Committee kata u Bah Mayralborn Syiem, MLA, Bah Sosthenes Sohtun MLA, bad kong Santa Mary Shylla MLA, ha ryngkat ki dkhot ba shu pynrung C.P. U Marak IFS (Retd.), Dr. W. Ryngkhlem, ki ophisar ka district, bad ki ophisar ka Meghalaya Assembly.
La sdang ia kane ka sngi da ka jingialang ha Khliehriat Circuit House, bad la pynbud sa ki jingleit jurip ia ka Jaintia Coke Pvt. Ltd ha Shiehruphi, ka Dalmia Cement Bharat Limited ha Thangskai, bad ka Star Cement ha Lumshnong, baroh ki don ha East Jaintia Hills.
Ha ka jingleit jurip ia ka Star Cement, Lumshnong, u Bah Wailadmiki Shylla u la ban jur ia ka bynta jong ka Committee ban pynthikna ba ki kam karkhana kim dei ban wan ha ka jingduhnong jong ka jingpynjot ia ka mariang. “Kum ki nongshong shnong bad ki dkhot jong ka committee, ngi don ka kam kaba kongsan ban pynthikna ba ka jingpynneh pynsah ïa ka mariang bad ki kam khaii pateng kin ïaid ryngkat ryngkat,” u la kynthoh.
“Ngi don ka jingkitkhlieh ban iehnoh shadien ia ka mariang kaba kham bha bad ka lawei kaba phyrnai na ka bynta ki pateng ban wan,” u la ong, haba pynpaw ia ka jingdonkam jong ka roi ka par kaba neh ha ka thain.
U Bah Shylla u la khot ruh ia ka tnad ba iadon bynta ha ka kam, ba kan ai ia ka komiti ia ka thup ba bniah jong baroh ki karkhana coke ba don ha Ri-lum Jaintia, kiba la ioh jingbit bad ki ba beain, lada don. U la pan shuh shuh ia ki jingtip ba bniah shaphang ki tyllong jong ki par ba la pyndonkam da kine ki karkhana. U la wad ruh ia ka thup jong ki jaka tih maw ha baroh ar tylli ki thain East bad West Jaintia Hills, kynthup ia ki jaka tih mawshun bad tih maw.
“Nga pan ruh ia ka kaiphod jong ka jinglong ka lyer jong u bnai Nohprah, namar ba ki jingkhein ba la ai sha ka committee haduh mynta ki kynthup tang ia ki khyndiat bnai ba la dep, kiba dei ha ka por jur slap” u la bynrap.
U Shri Shylla u la kren ruh halor ka jingdonkam jong ka jingshngain jong ki nongtrei bad ka jingpynrung kam ha ka thain ha ka kam shna dewbilat. “Nga kyrpad ba ki nongmihkhmat jong ki karkhana dewbilat kin buh hakhmat eh ia ka koit ka khiah jong ki nongtrei jong ki. Pynthikna ba yn pynbiang ia ki tiar kiba biang bad ban peit bniah ia ka koit ka khiah man ka por. Kum u nongshong shnong, nga kyrpad ruh ba kin aikam kham bun ki briew trai shnong ha kine ki karkhana. Ki don bun ki samla kiba don ia ka kyrdan pule ha ka chemical engineering, civil engineering, bad kiwei kiwei ki jait kam, kumta nga kyrpad ïa ki trai karkhana ban pynrung ïa ki sap ba don ha ka thaiñ kham kloi katba lah,” u la ong.
U Bah Mayralborn Syiem u la kren halor ka jingkitkhlieh jong ka committee ban peit ïa ki kam ba ïadei bad ka mariang kiba ïadei bad ki karkhana bad ki unit ba don ha ka thaiñ, ban pynthikna ba kin ym buh ïa ki paidbah ha ka jingma. U la kubur ia ka bynta jong ki riew shimet ha ka roi ka par jong ka jylla bad u la pdiang sngewbha ia ka jingpyrshang jong ki.
U Bah Sosthenes Sohtun u la pynpaw ia ka jingsngewnguh ia ki kompeni kiba la noh synniang sha ka ioh kam ioh jam ha ka jylla hynrei u la ban jur ia ka jingdonkam ban don ka jingkitkhlieh kaba kham khraw ia ka mariang. U la ban jur ia ka jingdonkam ban pyndonkam ia ki jingthmu jong ka CSR ban kyntiew ia ka jingpynneh pynsah ia ka mariang.
U la pynpaw ruh ia ki jingsngewkhia halor ki rukom tih marpoh khyndew, khamtam eh ia ka jingtih mawshun, bad u la kyntu ia ki tnad ba dei peit ban thaw ia ki kyndon ban iada na ka jingktah kaba kham jur ia ka mariang. U la ai jingmut ban pyntreikam ia ki kyndon kiba shai na ka bynta ka jingtih mar kaba neh.
Ka kong Santa Mary Shylla ka la pynpaw ia kine ki jingeh bad kyntu ia ki kompeni ba kin shim khia bha ia ka jingpynbha ia ka mariang.
