Shillong, Jylliew 23: U Myntri Rangbah ka jylla Conrad K Sangma ula leit jngoh ia ka dukan ‘Safal’ kaba don ha Delhi, kaba la pyniaid da ka Mother Dairy Fruit and Vegetable Pvt. Ltd bad kane ka jingleit jngoh ka pyni ia ka jingpyrshang jong ka Sorkar ban kyntiew ia ki mar rep ba pynmih da ka jylla Meghalaya.
Ki sohtrun kiba la pynmih na Meghalaya ki bym shim la pyndonkam ia kino kino ki dawai dashin, kidei kiba thiang bad kiba bang bha kiba shongdor ha ka Brix kumba 16 haduh 18+, kidei kiba kyrpang jong ka jylla Meghalaya.
Kine ki soh kidei kiba thiang bad kiba shngiam kiba ka rong ka rup ki long beh stem bad ksiar. Haba kine ki soh kila ih bha ki da thing bha bad ka acid kaba mih ka long kaba duna bha kaba long tang 0.6-1.2%.
Ia kine ki soh la shalan ha ki iew kiba don hapoh ka ri bad shabar jong ka ri India da kaba shimkhia bha ha kaba hap ban jam ia ki wah, ki riat ki ram ban poi sha ki iew ki hat ha kylleng ka ri India.
La buh kyrpang ia ka IQF ne Individual Quick Freezing hapoh jongka Umdihar Cooperative Society, kaba la pyniaid haduh 250 MT u sohtrun ia kabaka don ia ka jingthmu ban pyniaid haduh 600 MT mynta u snem, ia kaba la shim na ki kynhun nongrep ki bapher bapher na Khasi bad Garo Hills.
Ha katei ka jingjurip, u Myntri Rangbah ula shha pynkup burom ha u Manish Bandlish, uba long u Managing Director ka Mother Dairy Fruit and Vegetable Pvt. Ltd.
U Conrad K Sangma ula ong, “Ka Meghalaya kala pynmih shibun bha ki sohtrun bad kiwei kiwei ki soh bad ki marbam mardih lyngba ki jongki, hynrei ka jingeh kaba iakynduh kadei ka jingdonkam ia ka iew ka hat kaba biang bha kaba lah ban pyniasoh ia ki nongdie bad ki nongthied.
Halor kane, ka sorkar Meghalaya kala shim ia kiba bun ki lad ki lynti ha kine ki 3 snem, kynthup ia ka jingpynlong ia ka Pineapple Festival ha Delhi ha u snem ba la dep, ia kaba yn pynlong biang mynta u snem ruh.
“Ngi la iatreilang ruh bad kiwei kiwei ki kynhun kiba don ia ki dukan ha kylleng ka ri ban pynthikna ba kan don ka jingshalan kaba thikna. Kumba long mynta ka dukan Safal kala shu pyrshang ban pyniaid iew ia u sohtrun na Meghalaya kaba tang 250 Kg” ula ong haba bynrap “Nga la ioh jingtip na u Manish Bandlish, u Managing Director ka Mother Dairy, ba ka jinglong jingman bad ka jingiaid iew ka long kaba biang bha bad ngi dap da ka jingkmen ban sdang shuh shuh ban phah ia ki mar rep kiba la pynmih da ki nongrep ka jylla ban poi ha ka ri baroh kawei”.
Ka Safal kala sdang pyniaid ia u Sohtrun Meghalaya uba la phah lyngba ka Muktidata Multipurpose Cooperative Society ha Tikrikilla, West Garo Hills, na ka bynta ban shu ai mad ia ki nongthied ha katei ka dukan. Ki nongthied kila ai ia ka jingpynsngew kaba bha halor ka jinglong bad jingthiang u Sohtrun na Meghalaya.
Katba u Manish Bandlish, ula ong “Ki Sohtrun na ki jaka lum ka Meghalaya kila nang pynbun shuh shuh ia ki mar die ki jong ngi, ngi khmih lynti ban iatreilang bad ki nongrep lyngba ka jingkyrshan jong ka sorkar Meghalaya na ka bynta ban ioh shuh shuh ia ki mar naduh ki soh, ki musli musla bad kiwei kiwei kiba long kyrpang ha ka jylla”.
Ka sorkar kan iai bteng ha kaban plie la ia ki nongrep bad ia ki Cooperative na kiwei pat ki thain jong ka Meghalaya ba kin lah ban pynmih thikna ia ki marrep khnang ba yn lah ban pynbiang ia ki nongthied hapoh Delhi. Ka jylla kaba don arsien ha ka shisnem ia ka jingmih u sihtrun kan lah ruh ban shalan ia u sohtrun ha ka por tlang naduh u Naiwieng haduh u Rymphang ha kylleng ki ri.
