Nongpoh, Nailur 26 : Ka Ophis u DMHO bad ka District Veterinary ka Ri-Bhoi District, ha ka sngi Palei, kila pynlong ia ka jingialap ban pynsngewthuh ia ki paidbah ka District halor ka jingpang Rabies.
Ia kane ka jingialap la pynlong ha skul St Paul Higher Secondary School, Nongpoh kum shibynta jong ka jingrakhe ia ka World Rabies Week, kaba la sdang naduh ka 23 tarik Nailur haduh ka 28 tarik Nailur halor ka phang “Breaking the Rabbies Boundaries”.
Ka jingpang rabies ka dei ka jingpang kaba ma bha kaba lah ban saphriang na ka jingshah dait ne shah trot ha ki kynja mrad kiba don ia u khniang jingpang. Ka dei ruh ka jingpang kaba lah ban shim ia ka jingim briew lada ym ai jingsumar.
Haba kren maitphang, u heh ka Veterinary Dr F Nongdhar bad u Medical Officer Dr Benjamin Ch Momin, kila ai ia ka jing batai kaba bniah halor kane ka jingpang haba pyntip baka jingiap jong ki briew na ka jingpang rabies kala nang kiew ha Ri India namar ka daw ka jingleh bym suidniew ban phah sumar.
Kine ki doktor kila hikai ia ki paidbah kumno ban leh haba ki shah dait ha ki mrad ban lait na kane ka jingpang kaba kyn thup ia ka jingsait mar mar da ka sabon na ka jaka ba shah dait, ban leit pyni sha ki doktor ha ki jaka sumar ban ioh ia ki injekshon.
Kila kyntu ruh ia ki paidbah kiba ri ksew ne miaw bad kiwei kiwei, ba ki dei ban lei tai injek iala ki jong ki jingri khnang ba kin nym kit ia kane ka jingpang.
Kila kyntu ia ki paidbah ba kin iatreilang bad ki bo Sorkar ha kaban lah pynduh jait bad rat dyngkhong noh ia kane ka jingpang hapoh u snem 2030.
