Nongpoh, Lber 20 : Ka Meghalaya State Pollution Control Board (MSPCB) ha ka sngi Palei, kala hiar leh audit ia ka jing pynmih tdem jong ki karkhana kiba don ha Industrial Estate, Byrnihat haba pynpaw ia ka jingdonkam ban don noh da ka shnat treikam lajong ha Byrnihat khnang ban tehlakam ia ki karkhana ba kin bud ryntih ia ki ain ki kanoon.
Ka MSPCB kala leh ia kane ka audit halor ka hukum bala pynmih da u Commissioner & Secretary ka Tnad Forest & Environment kaba long kat kum ka jingbthah jong u Myntri Rangbah ka Jylla Conrad K Sangma hadien ka jingialang bad ki Heh Ophisar ka Tnad.
Kane ka hukum kala mih ruh hadien ka jingmih khubor ia ka jingioh jingithuh ka sor Byrnihat kum ka sor ba jaboh tam ka lyer ha ka pyrthei. Ka Sorkar kala aipor 7 sngi ia ka MPSCB ba kan aiti ia ka kaiphod.
Ka MSPCB hapoh ka jinglam khmat u Member Secretary Dr GH Chyrmang, MFSbad Bah S Swer, Scientist bad ki Environmental Engineer, kila hiar jurip ia ki 8 tylli ki karkhana kiba ju pynmih bha ia ka tdem jaboh hynne ka sngi Palei, ban pyndep ia ka jingleh audit halor ka jingpynmih tdem kine ki karkhana.
U Dr Chyrmang haba iakren bad ki lad pathai khubor, ula iathuh ba ka MSPCB kala shem ia ka jingleh shalak jong kine ki karkhana ha ka jingwan jurip bad jingleh audit jong ka Tnad.
“Kine ki karkhana ki dei kiba ju pynkhein ia ki Ain bad ki kyndon bala buh bad ka Board kala lap teng ia kane. Kine ki karkhana kim ju pyndonkam ia ka kor Pollution Control Device (PCD), ka kor ba lah ban pynduna ia ka jingpynmih tdem jaboh ha ka por ba pyntreikam ia ki kor ki bor” ula ong haba bynrap “Kila leh ia kane tang ban lait kiew ka bai bording elektrik”.
“Hynrei ki ju pyndonkam ia ka kor PCD tang ha ka por ba don ka jingjurip jong ki bor Sorkar khamtam ka MSPCB” ula kynthoh. U Dr Chyrmang ula ong ba ka kyndon ain kala kren shai kdar ba ki karkhana ki hap ban pyndonkam beit ia ka kor PCD haba ki treikam khnang ba kin nym pynmih ia ka tdem jaboh sha ka mariang.
Halor kane ka jingshem, une u Heh ka MSPCB ula pynpaw ia ka jingdonkam ba ka Board ka dei ban don noh ia ka shnat treikam ne Ophis ha Byrnihat khnang ba ki nongtrei kin ioh ban peitngor bha ia ka jingbud ryntih ki karkhana ia ki ain ki kyndon bala buh da ka Sorkar.
Ha kajuh ka por, u Dr Chyrmang ula pyntip ba ka MSPCB kan sa jurip ruh sa ia ka jingpyntuid ia ka jaboh ba mih na kine ki karkhana sha ki wah ha kine ki sngi ban wan.
“Ngi la iohpor 7 sngi na ka Sorkar ban jurip bad leh ia ka audit bad ngin sa phah ia ka kaiphod jingshem bad ki sienjam ba ngi la shim sha ka Sorkar ba kan bishar bad shim rai ia ki sienjam ban bud” ula ong.
 ha ka sngi Palei, kala hiar leh audit ia ka jing pynmih tdem jong ki karkhana kiba don ha Industrial Estate, Byrnihat haba pynpaw ia ka jingdonkam ban don noh da ka shnat treikam lajong ha Byrnihat khnang ban tehlakam ia ki karkhana ba kin bud ryntih ia ki ain ki kanoon.){kind=link}