Kenny Jyrwa & Arsen Sawkmie
Shillong, Nailar 01: Ka Sohra-ka jaka ba jur slap tam ha pyrthei, kaba dap da ki lum ki khlaw ba jyrngam bad ki kshaid ba noh rymphum, ka dei ka jaka jngohkai pyrthei ba khring bha ha Meghalaya hynrei kane ka jaka ba pawnam, kaba ju shlei da ki riew ieid mariang, mynta kala sdang kynjah slam slam namar ka jingrit mynsiem jong ki nongshang suwari ban wan sha kane ka jaka.
Ap ka jinghiran ia ka Sohra?
Kiba bun bah ki Nongshongshnong ka thain Sohra ki shaniah tylli ha ka kam jngohkai pyrthei ban kamai jakpoh, la ka dei na ka jingai jaka sah ia ki briew ba wan kai, ka jingpynbiang marbam mardih ne long kum ki nongialam lynti kaba ki ong ki tour guides.
Ka kynhun Ka Shlem kala hiar leit kai mynta ka taiew sha ki katto katne ki jaka jngohkai ba khring briew bha ha Sohra bad shem ba kine ki jaka kila kynjah bha ha ka jingdon ki nongwankai haba ianujor wat tang ha ka taiew bala leit noh. Ka jaka ba pawnam kum ka Noh Kalikai, kaba ju don da ki spah ngut ki nongwan kai ha ki sngi poh-ia bad da ki hajar ha ki sngi kut taiew, mynta kila iohi tang hapdeng 10-20 ngut eh ki briew.
Ha lynti ban leit sha Sohra kata ha Mawkdok, ka jaka kaba ki nongshang suwari ki ju sngewtynnad bha ban sangeh bad peit kai hashuwa ban hiar sha Sohra, mynta kala kynjah bad la iohi ba tang khyndiat eh ki nongshang suwari kila don ha kane ka jaka bad peitkai ia ki lum kiba ithiang bad ban bam ia ki jingbam kum u rewhadem thang bad kiwei kiwei.
Haba iakren bad ki nongdie jingdie, kila pynoaw ba ka jinghiar kynsan ha ka jingwan kai ki nongshang suwari kala ktah bha ia ki nongshongshnong ka thain kiba im jakpoh na ki kam jngohkai, kiba la mad ia ka jinghiran bad ka jinghiar bun shah ka kamai kajih.
Kila ong ba kane baroh ka wan jia hadien ka jingjia ba 26 tarik Naitung-ka sngi kaba ka seng Hynniewtrep National Youth Front kala mih ban pakhang lynti bad pynphai lut ia baroh ki kali Tourist ba wan na Assam ha ka thain Umtyngngar.
Uwei u nongdie ngap, musli musla bad souvenir ha Noh Kalikai ula kynthoh “Nangno shuh ngin ioh ban bsa iala ka iing ka sem”. Kum u Kpa ba sumar ia lai ngut ki khun bad shaniah tylli ha ka kam jngohkai ban kamai jakpoh, ula sngew bynniaw jur ban iohi ia ka jingthylli ki jaka pynieng kali. Ula ong ba kane baroh ka jia namar ka jingjia ba 26 tarik.
Uwei u nongpyniaid restaurant ula ong ba ha ka 26 tarik, ka restaurant kala hap ban bret ia bun bah ka bam ka dih tang namar katei ka jingjia.
Hynrei wat hapdeng kane ka jingjia, ki dang don hi katto katne ki nongshang suwari na kylleng ka Ri kiba dang wan kai hi sha ka thain namar ka jingkhring ki sawdong sawkun bad ki lum ki kshaid jong ka thain.
Katto katne ngut ki briew na Assam bad wat naduh Hyderabad bad Uttar Pradesh kila iapoi sha Sohra bad kila pynpaw ia ka jingkmen ba kila ioh ka lad ban wan iuhkjat ha kane ka Ri-lum Khasi, kaba kila thrang har har ban poi ha ka jingim ka jong ki.
Ka jingjia ba jia ha ka 26 tarik Naitung ka lah ban dei tang ka jingjia kaba rit eh hynrei ka jingpur sted jong kane ka khubor lyngba ki rynsan social media, kala ktah jur bha ia ka kam jngohkai pyrthei ha ka Jylla. Namar kata, ka Sorkar bad ki Kynhun Sengbhalang ki dei ban pyrkhat bha haba ki shim ia kano kano ka sienjam namar lada bakla khlem pep kan urlong ka ktien kaba ki ong “Nang ialympat ki hati, iap ei ki phlang”.
