Shillong, Risaw 08 : U Myntri ka tnad jngohkai Bah Paul Lyngdoh ha ka sngi Ba-ar, ula pynbna ba ka Sorkar kala pynkhreh ban pyndep noh ia ka jingpynkynriah ia ki dukan madan na Khyndailad hapoh ki pdeng taiew u Naiwieng.
Ula pyntip ruh ba ka jingpynkynriah ia ki dukan madan ha kiwei kiwei ki jaka ha Nongbah Shillong kum ka Laitumkhrah bad kiwei kiwei, yn sa pynmih jingpynbna shen.
“Haba phai sha ka jingpynkynriah ia ki dukan madan, ka jingpynleit jingmut ba kongsan jong ngi ka long ba pynpoi ia kane ka kam sha kaba kut” ong u Bah Paul haba kdew ba ki don ki jaka ba kyrpang ha ki jaka khaii la buh beit thik tang ia ki dukan madan.
“Mynta ngin sa pynbna noh ia ki jaka shong dukan madan (vending zone) bad ha ka bynta ba nyngkong, ka dei ka Khyndailad bad ka bynta kaba ark a dei ka Laitumkhrah, kin dei shibynta na kane ka kam” ula bynrap.
U Bah Paul u pyntip ruh ba ka Sorkar ka don jingthmu ban ai da ki permit ia ki nongshong dukan madan bad ban sdang ruh ia ka kam ha kaban pynlong ia ka Khyndailad kum ka jaka iaid kjat u paidbah hadien bala dep pynkynriah ia baroh ki dukan madan.
Haba iadei bad ka jaka bala ithuh ban shong dukan madan ha Khyndailad, u Bah Paul ula ong “Ia mynta, ki don lai tylli ki jaka bala ithuh bad ngi dei ban lah ha kaban ai jaka ia baroh kito kiba shong dukan madan kiba pyndep ia baroh ki jingdonkam bala buh da ka Tnad Urban Affairs”.
Haba kylli, u Myntri ula ong “Kin don hapdeng 200 haduh 250 ngut ki nongshong dukan madan kiban shah pynkynriah”.
Halor ka jingdon ki nongshong dukan madan ba khlem pat register, u Bah Paul ula pynshai “Ka jingpynrung kyrteng kala iaid mynta la shisnem. Ki don ki kyndon bala buh shai bha da ka Sorkar bad kito kiba pyndep ia kine ki kyndon, kin don ha ka thup bala ithuh kum ki nongshong dukan madan bad tang kine kin ioh ia ka jingiarap na ka Sorkar”.
Lah ban kdew ba ka Sorkar lyngba ka jingiatreilang hapdeng ka Tnad Urban Affairs bad Tourism, ka don jingthmu ban pynkylla ia ka Khyndailad kum ka jaka iaid kjat u paidbah bad ka jaka iaput iatem (music hub). Ia kane la leh da ka jingthmu ban khring ia ki nongshangkai pyrthei kiba wan sha Shillong, kaba la bna nam kum ka Nongbah ka put ka tem ha Ri India.
