Nongstoiñ, Risaw 08: Ka St Xavier s Secondary School New Nongstoin, ha ka sngi ba-ar, ka la pynkut noh ia ka jingrakhe dap 25 snem lane Jubili Rupa.
Ha kane ka sngi la don ryngkat u MLA jong ka Nongstoin Bah Gabriel Wahlang kum u kongsan, nangta u MDC ka Mawkyrwat Bah Carness Sohshang ryngkat da ki riew pawkhmat bad riew rangbah jong ka thain Nongstoin.
Ia ka jingrakhe la pynlong ha phyllaw jong katei skul ha ryngkat kiba bun jait ki prokram ban pynphuh pynphieng ia kane ka sngi kyrpang. La ioh ruh ban sam ia ki khusnam bapher bapher da u kongsan bad symbud kongsan ryngkat kiwei de ki kynrem ki lyndan.
Kum ka dak ka jingrakhe la thang ia ka sharak da ki kongsan bad pyllait paidbah ruh ia ka Souvenir jong ka jingdap 25 snem jong ka skul.
Haba ai jingkren, u kongsan u la pynpaw ka jingsngew sarong ba kane ka skul ka la jam sha une u mawmer jong ka jingiaid lynti. U la ong ba lehse hapdeng kiba bun ki jingpyrshang jong ka skul ban tbeh ia ka sharak jingshai ha ka pule puthi, ka la hap ban mad ruh ki jingeh. Hynrei, haba poi ha une u mawmer ka jingdap 25 snem, ka burom ka long sha baroh kito kiba la shim bynta ban prat lynti bad pynlong ia kane ka skul kumba ka long mynta.
