Shillong Lber 07: Ka Meghalaya Energy Corporation Limited (MeECL) hynne ka sngi Palei, kala leit ban ot naphang ia ka bording elektrik kaba la shu tan tuh da ki briew kiba sah ha Maxwelton Estate, kaba don ha Rilbong.
Kane ka jingleit ot ia ka bording elektrik jong ka MeECL ka dei hadien ba ka KSU Laban Circle myn ha ka 6 tarik u Lber, kala leit ai da ka jingujor ha u Chairman ka MeECL bad kila leit ruh ban iakynduh ia u Director ka MePDCL, ban ujor halor ka jingring bording tuh da ki briew ba sah beaiñ ha Maxwelton Estate.
Ka KSU Laban Circle kala pyntip ba ka MeECL ka la phah ia ka kynhun hynne ka step ban leit jurip ia katei ka jaka bad kila lap ba kala don shisha ka jingtuh bor ding elektrik.
“Ka MeECL kala lap ba don ki ïing ba na uwei u meter elektrik, ki sam bording sha 14 tylli ki ïing, don kiwei kiwei pat kiba ai bording sha 4-5 tylli ki ïing bad kumta ter ter. Ka MeECL kala ot ia ka bording jong kitei ki ïing baroh kiba tuh ia ka bording bad kin sa ai Notis ruh ia kine ki briew ha kine ki sngi ban shah daiñ kuna” iathuh ka KSU Laban Circle.
Nalor kane, kila iathuh ruh ba ka MeECL kala lap ba don 27 tylli ki iing kiba biang ia u meter bording bad kine kila ai pat sha kumba 50 tylli eiei ki ïing kaba long beaiñ bad ka MeECL kala ot noh ia ka bording jong kine ki 50 tylli eiei ki ïing.
Ka KSU Laban Circle ka ai jingiaroh bad ka pynpaw iaka jingsngewnguh ia ka jingkitkhia bad ka jingkloi jong ka tnad MeECL ban hiar jurip ban leh ia kaba donkam.
Ka KSU kala pyntip ruh ba shen kan sa leit ban ai biang iaka dorkhas, ba kine ki briew kin ym ioh ban applai ia ka bording elektrik khlem ki kot ki sla ba biang bad khlem da ioh ia ka NOC na ka Dorbar Shnong bad kan pan jingpynshai ruh ba kumno kitei kiwei pat ki 27 tylli ki iing ki ioh ia ka bording ilektrik bad ki ai da ki kot ki sla kiba kumno, khamtam kiba leh iaka ‘Prepaid Connection’ ki dei kiba dang shu applai dang shen.
Ka Seng ka kyntu ruh ia ka Shillong Municipal Board (SMB) ban weng noh ia ki masi na katei ka jaka katkum ki kyndon aiñ kumba la kular ha khmat ka Deputy Commissioner ha ka 29 tarik u Rymphang, 2024 bad lada ka SMB ka pynslem, ka Seng kan pynlong da ka jingiakhih ha khmat Ophis jong ka SMB.
