Thwet jur ki pulit Assam ïa ki Longiing bym kwah leit sha Assam
Nongstoiñ, Lber 28: Ka Hima Nonglang Sirdarship kala hap ban pynrieh bad ai jingiada ïa ki 25 ngut ki nong Malchapara kiba shah pyndik bad shah thwet ha ki pulit Assam naduh kine ki khyndiat sngi ba la dep.
U Vinat Sangma uwei na ki riew rangbah ka shnong Malchapara, ka shnong kaba dang hap hapoh ka Hima Nonglang, u la ïathuh ba ka jingmih ka jingïakajia ha kine ki khyndiat taiew ha katei ka jaka, ka long namar ka la don ka kynhun jong ki 35 Ïing kiba don ha katei ka shnong, kiba khang pyrshah ïa kitei ki 25 ngut ban leit ïalehkai kriket ha ka madan shnong.
La kynnoh ba kitei ki 35 ïing ki ong ba ïa katei ka madan la aiti ha ka Assam hadien ka jingiapynbeit pud sam lyngba ka MOU ha u snem ba la dep, kumta ym shah shuh ïa kito kiba dang kwah ban hap ha Meghalaya ba kin dang rung ne ïalehkai ha jaka jong ka Assam.
Naduh katei ka sngi ba shah khang ïalehkai kriket, ki pulit Assam ruh mar mar lyngba ka jingkyrshan jong kitei ki 35 ïing ba leit sha Assam, ki la thwet ïa kitei ki 25 ngut ki samla da ka jingthmu ban kem bad pynngat ïa ki ha ki kyndon aiñ.
U Secretary ka Hima Nonglang Bah Birbor Riangtem, u la iathuh ba ka Hima kum ka sienjam ban kiar ia kaei kaba la jia ha Mukroh, kala wanrah noh ia kine ki 25 ngut ki samla ba shah thwet sha ha Office ka Hima kaba don ha Langdongdai ban pynrieh na ki Pulit ka Assam.
U la ong ruh ba ka Hima ka hap ban ri ban sumar ïa ki hapoh ophis jong ka Hima tad haduh ba ka sorkar Jylla kan tuklar halor kane ka jingjia kaba la jia mynta ha katei ka thaiñ.
U la kyrpad ruh ïa ka Sorkar ban ïarap lem ïa ka Hima namar ki paidbah bad ka Hima hi ki la lynga bad mad jingeh tang hadien ka MOU ba la ïa soi da ka Sorkar MDA ha u snem ba la dep.
Pule lang ia kane: Pynrem ka MPCC ba shah mait kyrteng u Rahul Gandhi kum u MP ka Lok Sabha
